Թեհրանի «Մարիամ» պատկերասրահում կցուցադրվեն հայ առաջատար արվեստագետների գործերը
Թեհրանի քաղաքապետարանի մշակութային և գեղարվեստական կազմակերպության լրատվական ծառայությունը տեղեկացնում է, որ Թեհրանի Արտակ Մանուկյան թանգարանի համագործակցությամբ, քաղաքի «Մարիամ» պատկերասրահում կցուցադրվեն Իրանի ժամանկակից արվեստների հայ առաջատար արվեստագետների գործերը:
Թեհրանի «Մարիամ» պատկերասրահում կցուցադրվեն Իրանի ժամանակակից արվեստում մեծ դերակատարություն ունեցած արձանագործ Լիլիթ Տերյանի, գրաֆիստ Սերժ Ավագյանի, գեղանկարիչ՝ Էդման Այվազյանի, գեղանկարիչ և լուսանկարիչ Սիմոն Այվազյանի և գեղանկարիչ Գառնիկ Հակոբյանի գործերը:
Արվեստագետ Բեհնամ Քամրանը ցուցահանդեսի մասին ասել է.-«Հայ մշակույթն ու արվեստը կապված են իրանական մշակույթի հետ: Հայկական արվեստը ազդվել է իրանական արվեստից ու մշակույթից ու ազդել դրանց վրա»:
Ցուցահանդեսը կկայանա Ամանորի և Սուրբ Ծննդյան տոների առիթով ` հունվարի 6-ին: Ցուցահանդեսի բացման միջոցառմանը ներկա կգտնվեն Թեհրանի քաղաքապետարանի մշակութային և գեղարվեստական կազմակերպության տնօրեն Մահմուդ Սալեհին, Թեհրանի հայոց թեմի Առաջնորդ Սեպուհ Արք. Սարգսյանը և Իսլամական Խորհրդարանում հյուսիսային իրանահայության պատգամավոր Կարեն Խանլարյանը:
