Իրանը կամքերի պայքարում պարտության կմատնի ԱՄՆ-ին. Ռոհանի
ԻԻՀ նախագահը չորեքշաբթի երեկոյան նշել է, որ Իրանի ժողովուրդը որևէ ժամանակ գլուխ չի խոնարհել ու չի խոնարհելու ոտնձգիչների դիմաց: Նա ընդգծել է. «Կամքերի պայքարում իրանցիները պարտության կմատնեն ԱՄՆ-ին»:
Հասան Ռոհանին Իրանի կառավարության ավագ տնօրենների համաժողովում անդրադառնալով ՀԳՀԾ-ից ԱՄՆ-ի հրաժարմանն, ասել է. «Այս քայլից անցնող 51 օրերի ընթացքում աշխարհի բոլոր երկրները դատապարտել են Թրամփին ու ԱՄՆ-ի իշխանավորներին, սակայն որևէ մեկը չի խոսել այն մասին, որ ԻԻՀ-ն նահանջել է և կամ սարսափել է պատժամիջոցներից: Ընդհակառակը, բոլորն արտահայտվում են Իրանի խոհեմության ու հնարամտության մասին»:
ԻԻՀ նախագահն ընդգծել է, որ ՀԳՀԾ-ն կանգուն է, հավելելավ. «Ամերիկացիները, սիոնիստներն ու տարածաշրջանում ԻԻՀ-ի թշնամիները ենթադրում էին, որ ՀԳՀԾ-ից ԱՄՆ-ի հրաժարման մասին հայտարարվելուց հետո Իրանն էլ մի քանի ժամվա տարբերությամբ այդ համաձայնությունից կհրաժարվի, սակայն Իրանը զգացմունքային ու հապճեպ որոշում չընդունեց»:
«Երբ ԻԻՀ-ն հայտարարեց, որ բարեկամների, եվրոպական երկրների, Ռուսաստանի ու Չինաստանի խնդրանքով ՀԳՀԾ-ի պահպանման համար ժամանակ է տալիս այդ երկրներին, ամերիկացիները, սիոնիստներն ու տարածաշրջանային թշնամիները քար կտրեցին ու Իրանի ժողովրդի ի գործ դրած հնարամտության պատճառով այնպիսի հարված ստացան, որ դրա մասին որևէ պատկերացում չէին կարող ունենալ»,-հայտարարել է Ռոհանին:
ԻԻՀ նախագահը նշել է, որ ՀԳՀԾ-ի հետ կապված ԱՄՆ-ի նոր դիրքորոշման հանդեպ ԻԻՀ-ն երեք հնարավորություններ ունի, որոնք են՝ ԱՄՆ-ի դիմաց հանձնվելը, ներքին տարաձայնություններով հանդերձ ԱՄՆ-ին դիմակայելը և կամ առանց ներքին տարաձայնությունների և ազգային փառքի պահպանմամբ ԱՄՆ-ին դիմակայելը: Նա հստակեցրել է. «Իրանի ժողովուրդն ընտրել է երրորդ ելքը և ԱՄՆ-ն կամքերի այս պայքարում ծնկի է գալու»:
