Մամուլի տեսություն – 16.05.2023
Ռուսաստանը նախազգուշացրել է Կենտրոնական Ասիայում ԱՄՆ-ի և ՆԱՏՕ-ի ներկայության մասին և արևմուտքի նպատակն անվանել է «Ռուսաստանին ճնշել» և սպառնալ նրան։
Իրան օրաթերթ
Դոկտոր Հաբիբ Ֆայազ. Եթէ Իրանը չլիներ. ԻԼԻՊ-ն այժմ Բեյրութում էր: Ամերիկան չի համարձակվի հարձակվել հզոր Իրանի վրա
Անդրադառնալով տարածաշրջանում ԻԻՀ դերին և նրա մեծ հզորությանը, այս փորձագետ և Լիբանանի համալսարանի վաստակաշատ պրոֆեսորն ասաց. «Եթե Իրանը չլիներ, ԻԼԻՊ ահաբեկչական խմբավորումը հենց հիմա Բեյրութում կլիներ։
Նրա խոսքով՝ Իրանի հետ Արևմուտքի խնդիրն այն է, որ այս երկիրը ցանկանում է ունենալ մոդեռնիզմի իր մոդելը, որը տարբերվում է նրանից, ինչ գոյություն ունի Արևմուտքում։
Ֆայազն ասել է. «Երեք հատկանիշ Իրանին միշտ պահում է կախվածության և անկախության առճակատման գծում. Առաջինը նրա աշխարհագրական դիրքն է, որը ոչ ոք չի թաքցնում, երկրորդը՝ այս երկրի առատ հարստությունն ու բնական պաշարները, երրորդը՝ Իրանի ժողովրդի ինտելեկտը։
Էթեմադ օրաթերթ
Ռուսաստանի նախազգուշացումը Կենտրոնական Ասիայում ԱՄՆ-ի և ՆԱՏՕ-ի տեղաշարժերի մասին
Ռուսաստանի փոխարտգործնախարարը զգուշացրել է Կենտրոնական Ասիայում Ամերիկայի և ՆԱՏՕ-ի առկայության մասին և արևմուտքի ներկայության նպատակն անվանել է «Ռուսաստանին ճնշել» և նրան սպառնալ։
Ռուսաստանի փոխարտգործնախարար Միխայիլ Գալոժինը հայտարարել է, որ ԱՄՆ-ն և ՆԱՏՕ-ն փորձում են հենակետ հաստատել Կենտրոնական Ասիայում և այս տարածաշրջանից սպառնալ Ռուսաստանի հարավային սահմանները։
Մոսկովյան բարձրաստիճան դիվանագետն ասել է. «ԱՄՆ-ը և ՆԱՏՕ-ն փորձում են Կենտրոնական Ասիայի երկրներին ներառել այսպես կոչված «գործընկեր» ծրագրերում և զորավարժություններում, և (նրանք) չեն դադարում խոսել տարածաշրջանում համատեղ զորավարժությունների վերականգնման և իրենց ռազմական ու ենթակառուցվածքների ստեղծման մասին»։
Ջամե Ջամ օրաթերթ
Հայաստանում 3000 տարվա հնությամբ թոնրատուն է հայտնաբերվել, որը դեռ ալյուրով է պատված
Մեծամուր հնավայրում պեղված ավերակում հայտնաբերվել են 3000 տարի առաջ գործող շատ մեծ հացատան մնացորդներ։ Այս մեծ կառույցը օգտագործվել է մ.թ.ա 11-րդ դարի վերջից մինչև մ.թ.ա. 9-րդ դարի սկիզբը։ Մեծամորը գտնվում է Հայաստանի մայրաքաղաք Երևանից 20 մղոն հարավ-արևմուտք, Թուրքիայի սահմանի մոտ:
Էթեմադ օրաթերթ
Քեմալ Քըլըչդարօղլուի օգնականի անսպասելի հրաժարականը
Նախընտրական քարոզարշավի ամենաթեժ պահին Թուրքիայի Ժողովրդահանրապետական կուսակցության ղեկավար Քեմալ Քըլըչդարօղլուի օգնականը հրաժարական է տվել այս կուսակցությունում զբաղեցրած պաշտոնից։ Նշվում է, որ Քեմալ Քըլըչդարօղլուի օգնականի հրաժարականը պայմանավորված է եղել Թուրքիայի նախագահական ընտրությունների արդյունքներով։
Շարղ օրաթերթ
Մենք ցանկանում ենք ընդլայնել հարաբերությունները Իրանի հետ
Պարսից ծոցի համակարգող խորհրդի քարտուղարն ասել է. «Մոտ ապագայում մենք կարող ենք լավ հնարավորություններ ունենալ Իրանի հետ հարաբերություններում»։ Պարսից ծոցի համագործակցության խորհրդի անդամներն ընդգծում են առանց կառավարությունների միջամտության համագործակցությունը, իսկ Իրանի հետ հարաբերությունների ընդլայնումը դիտարկվում է այս խորհրդի կողմից։
tert.am
Փաշինյանի աշխատանքին միանշանակ հավանություն է տվել հարցվածների 13,9 տոկոսը, 38.7 տոկոսը ընդհանրապես հավանություն չի տվել․ GALLUP International Association
ՀՀ վարչապետի աշխատանքին միանշանակ հավանություն է տվել հարցվածների միայն 13.9 տոկոսը, 24.1 տոկոսը՝ ավելի շուտ հավանություն է տալիս, 12.3 տոկոսը՝ ավելի շուտ հավանություն չի տալիս, 38.7 տոկոսը ընդհանրապես հավանություն չի տալիս:
Այս մասին է են վկայում «GALLUP International Association»-ի հայաստանյան ներկայացուցչության հերթական հետազոտության տվյալները, որոնք ներկայացրել է տնօրեն Արամ Նավասարդյանը:
Կառավարության աշխատանքին միանշանակ հավանություն է տալիս 10.8 տոկոսը, 21.9 տոկոսը՝ ավելի շուտ հավանություն է տալիս, 11.8 տոկոսը՝ ավելի շուտ հավանություն չի տալիս, 42.5 տոկոսը ընդհանրապես հավանություն չի տալիս:
Ազգային ժողովի աշխատանքին հավանություն է տալիս 5.9 տոկոսը, իսկ 50.9 տոկոսը՝ ընդհանրապես հավանություն չի տալիս:
Նախագահի աշխատանքին 8.5 տոկոսը միանշանակ հավանություն է տալիս, 42.4 տոկոսը ընդհանրապես հավանություն չի տալիս:
Ներկա պահին որո՞նք են պետության առջև ծառացած երեք ամենակարևոր խնդիրները. 46.5 տոկոսը նշել է անվտանգության հետ կապված խնդիրները, սահմանների հստակեցման խնդիրներ՝ 37.3 տոկոս, պատերազմի վտանգ՝ 29.4 տոկոս, տնտեսական վիճակ՝ 26.8 տոկոս, Արցախի խնդիր՝ 14.8 տոկոս, գործազրկություն՝ 12 տոկոս, գերիների վերադարձ՝ 9.9 տոկոս:
Հետազոտությունն անցկացվել է ապրիլի 26-30-ն ընկած ժամանակահատվածում՝ 1100 հեռախոսային հարցումների միջոցով։
tert.am
ՅՈՒՆԵՍԿՕ-ում ՀՀ մշտական ներկայացուցիչը մտահոգ է Ադրբեջանի կողմից վերահսկվող տարածքներում հայկական ժառանգությանը սպառնացող վտանգների առնչությամբ
ՅՈՒՆԵՍԿՕ-ի կենտրոնակայանում մայիսի 15-ին մեկնարկել է Գործադիր խորհրդի 216-րդ նստաշրջանը։ Նույն օրը կայացած լիագումար առաջին նիստի ընթացքում ելույթով հանդես է եկել կազմակերպությունում ՀՀ մշտական ներկայացուցիչ, դեսպան Քրիստիան Տեր-Ստեփանյանը։
Ինչպես «Արմենպրես»-ը տեղեկանում է Հայաստանի Հանրապետության արտաքին գործերի նախարարության տարածած հաղորդագրությունից, անդրադառնալով արտակարգ և պատերազմական իրավիճակներում ՅՈՒՆԵՍԿՕ-ի կողմից ծավալվող գործունեությանը՝ ՀՀ մշտական ներկայացուցիչը հիշեցրել է Ադրբեջանի զինված ուժերի կողմից Հայաստանի ինքնիշխան տարածքի նկատմամբ 2022 թվականի սեպտեմբերի 13-ին սանձազերծած ագրեսիայի հետևանքով ստեղծված իրավիճակը, մասնավորապես՝ տուժած մարզերում կրթական համակարգի կրած վնասները և ներկայացրեց իրավիճակի հաղթահարման ուղղությամբ ձեռնարկված քայլերը։
Քրիստիան Տեր-Ստեփանյանը համոզմունք է հայտնել, որ ՅՈՒՆԵՍԿՕ-ն պատասխանատվություն է կրում բոլոր այն մարդկանց համար, որոնց կրթության իրավունքը ոտնահարվում է։ Այդ համատեքստում, նա հիշատակել է Ադրբեջանի կողմից Լաչինի միջանցքի արգելափակման հետևանքները Լեռնային Ղարաբաղի հայ բնակչության համար, այդ թվում՝ 30 000 երեխաների կրթության իրավունքի ոտնահարումը։ Նա վերահաստատել է նկարագրված իրավիճակով պայմանավորված ՄԱԿ միջգործակալական փաստահավաք առաքելության ուղարկման հրատապությունը։
tert.am
Հայաստանի օրակարգում ՀԱՊԿ-ից դուրս գալու հարց այս պահին չկա. ԱԳ փոխնախարար
ՀԱՊԿ-ից դուրս գալու քննարկումների կոնկրետ ժամկետը չեմ կարող նշել, ըստ երևույթին դա Անվտանգության խորհրդում է քննարկվել, կարծում եմ՝ սեպտեմբերյան իրադարձությունների ժամանակ։
Այս մասին լրագրողների հետ զրույցում ասաց ԱԳ փոխնախարար Մնացական Սաֆարյանը։
«Որոշում է ընդունվել չանել այդ քայլը ու շարունակել աշխատանքները, որովհետև կան հարցեր, որոնք հետագայում քննարկվեցին ՀԱՊԿ-ի գագաթաժողովի ընթացքում։ Շուտով հայտարարություն կլինի Հարավային Կովկասում իրավիճակի հետ կապված։
Այս պահին ՀԱՊԿ-ից դուրս գալու հարցը չկա օրակարգում։ Իրավիճակը բարդ է, մենք, լինելով ՀԱԿՊ-ի անդամ երկիր և ունենալով պարտավորություններ, շարունակում ենք հույս ունենալ, որ մեր աշխատանքները կբերեն որոշակի արդյունքների, դեռևս կա այդ հույսը։
Մենք բազմիցս հայտարարել ենք, որ ՀԱՊԿ-ի կողմից պետք է լինի իրավիճակի քաղաքական գնահատական, ինչ-որ պահի այդ քննարկումները կարող են նորից վերսկսել»,- ասաց նա։
armenpress.am
Հայերն ավելի անձայն են լինելու այս ժամանակահատվածում. Փայլանը հիասթափված է Թուրքիայի ընտրությունների արդյունքներից
ՍՏԱՄԲՈՒԼ, 16 ՄԱՅԻՍԻ, ԱՐՄԵՆՊՐԵՍ։ Թուրքիայի նախագահ Ռեջեփ Թայիփ Էրդողանը, ով դաշինք է կազմել ազգայնականների ու ծայրահեղականների հետ, կարողացավ հաղթել մայիսի 14-ի ընտրություններում և կունենա խորհրդարանական մեծամասնություն։ Սա նշանակում է, որ Թուրքիան առաջիկայում ավելի ազգայնական կդառնա, իսկ ազգայնական Թուրքիան ավելի մեծ դժվարությամբ է հարաբերությունները կարգավորելու Հայաստանի հետ։ «Արմենպրես»-ի թղթակցի հետ զրույցում նման կարծիք հայտնեց Թուրքիայի 27-րդ գումարման խորհրդարանի հայ պատգամավոր Գարո Փայլանը։
«Պետք է ջանք չխնայել՝ համոզելու Թուրքիային խաղաղություն հաստատել Հայաստանի հետ»,- նշեց նա։
Փայլանի խոսքով՝ կարևոր է, որ Թուրքիայում ժողովրդավարությունը զարգանա, քանի որ «միայն ժողովրդավար երկիրը կարող է լուծել իր խնդիրները հարևանների հետ»։
Պատգամավորն արձանագրում է, որ վերջին ընտրությունների արդյունքները չեն արդարացրել պոլսահայ համայնքի ակնկալիքները։
«Թուրքիայի հայերն արդեն վախի մեջ են։ Մինչև 2015 թվականը մենք խոսում էինք մեր խնդիրների մասին, մինչդեռ դրանից հետո հայերն ավելի լուռ են։ Հույս ունեինք, որ ինչ-որ բան կփոխվի այս ընտրությունների արդյունքում, սակայն այդպես չեղավ։ Դժբախտաբար, հայերն ավելի անձայն են լինելու այս ժամանակահատվածում»,- արձանագրեց Փայլանը։
armenpress.am
Ծանր վիճակում գտնվող 9 բուժառու ռուս խաղաղապահների ուղեկցությամբ Արցախից տեղափոխվել է Հայաստան
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Արցախի Հանրապետության առողջապահության նախարարության «Հանրապետական բժշկական կենտրոն»-ից ծանր առողջական վիճակում գտնվող 9 բուժառու, 7 ուղեկցողների հետ միասին, մայիսի 16-ին ռուս խաղաղապահների ուղեկցությամբ և շտապ օգնության մեքենաներով Արցախից տեղափոխվել են ՀՀ մասնագիտացված բժշկական կենտրոններ:
Ինչպես «Արմենպրես»-ը տեղեկանում է Արցախի առողջապահության նախարարության տարածած հաղորդագրությունից, տեղափոխության անհնարինության պատճառով վերջին շաբաթներին ավելի քան 100 բուժառու զրկվել է ՀՀ-ում բժշկական օգնություն ստանալու հնարավորությունից, որից 25-ի տեղափոխումը խիստ առաջնահերթ է։
armenpress.am
Իտալիայում առգրավել են 2.7 տ կոկաին, որը նախատեսված էր Հայաստան ուղարկելու համար
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Իտալիայի Ջոյա Տաուրո քաղաքի նավահանգստում ռեկորդային քանակի կոկաին են առգրավել՝ 2.7 տոննա: Թմրանյութի փաթեթները թաքցված են եղել Էկվադորից ժամանած երկու բեռնարկղերում, որոնցով տեղափոխվում էր 78 տոննա բանան: Կոկաինը նախատեսված էր Վրաստանի Բաթումիի նավահանգստով Հայաստան ուղարկելու համար: «Արմենպրես»-ի փոխանցմամբ՝ այդ մասին հաղորդում է ANSA գործակալությունը:
Թմրանյութերի միջազգային շրջանառության դեմ պայքարի գործողությունը համակարգել և գլխավորել է Ռեջո Կալաբրիայի շրջանի մաֆիայի դեմ պայքարի վարչությունը:
Ըստ վարչության տարածած մամուլի հաղորդագրության՝ առգրավված թմրանյութը եղել է «չափազանց բարձր որակի և հիանալի պահպանված վիճակում»: Այն թմրանյութեր վաճառողներին կբերեր շուրջ 800 միլիոն եվրոյի եկամուտ:
ANSA-ն նշում է, որ 2021 թ.-ի հունվարից մինչև հիմա Ջոյա Տոաուրոյի նավահանգստում իրավապահների կողմից առգրավվել է 37 տոննա կոկաին:
