ԱՄՆ-ը սահմանափակել է մարդասիրական օգնությունը սիրիացիներին՝ խարդախությունների պատճառով. WP
ԱՄՆ-ը դադարեցրել է մի շարք ծրագրերի գործողությունը՝ ուղղված Սիրիայի բնակիչներին մարդասիրական օգնություն մատակարարելուն։
Դրա պատճառը մտավախություններն են՝ կապված հնարավոր գողությունների և միջնորդների կողմից խարդախությունների հետ։ Այս մասին գրում է The Washington Post-ը՝ հղում անելով Միջազգային զարգացման ԱՄՆ գործակալության ներկայացուցիչներին։
Պարբերականի տվյալներով՝ գործակալությունը ստացել է 116 բողոք, ձեռնարկվել է 25 հետաքննություն, որից 2/3-ը վերաբերում է գողության դեպքերին։ Դրանց արդյունքներով հետ են կանչվել 239 մլն դոլարի պայմանագրեր։
«Չնայած մեր բարի մտադրություններին՝ վատ մարդիկ օգտվել են բարդ իրավիճակից ի շահ իրենց՝ սիրիացիներին զրկելով սննդից, հագուստից, դեղորայքից և այլ անհրաժեշտ իրերից»,- հայտարարել է USAID-ի գլխավոր տեսուչ Էն Կալվարեզի Բարը։
Ավելի վաղ ԱՄՆ-ը սահմանափակել էր մարդասիրական օգնությունը Թուրքիայում գտնվող սիրիացի փախստականներին՝ խարդախությունների պատճառով։
