ԱՄՆ ռազմաբազան հանձնվել է Աֆղանստանի բանակին և ԱՄՆ դրոշն իջեցվել է
Աֆղանստանի Հելմանդ նահանգում գտնվող ԱՄՆ ռազմաբազան պաշտոնապես հանձնվել է աֆղանական բանակին, և ԱՄՆ դրոշն իջեցվել է: Այդ մասին հաղորդում է ԻՌՆԱ լրատվական գործակալությունը:
Աֆղանստանի բանակի մամուլի խոսնակը հրապարակել է հաղորդագրություն, որում հայտարարել է.«Հելմանդ նահանգի Շորաբակ քաղաքում տեղակայված ԱՄՆ ռազմական բազան կիրակի օրը հանձնվել է աֆղանական բանակին, և Աֆղանստանի հատուկ նշանակության ջոկատները պատրաստվում են տեղակայվել բազայում»:
Շաբաթ օրը Քաբուլում կայացած մամուլի ասուլիսում, Աֆղանստանի ազգային անվտանգության հարցերով խորհրդական Համդուլլահ Մոհեբը հայտարարել էր, որ կիրակի օրն ԱՄՆ-ի Շորաբակ ռազմաբազան հանձնվելու է աֆղանական ուժերին, իսկ ամերիկյան զորքերը տեղափոխվելու են Բագրամ:
Աֆղանստանից օտարերկրյա օկուպացիոն ուժերի, այդ թվում՝ ամերիկացիների դուրսբերումը մեկնարկել է և մայրաքաղաք Քաբուլում և երկրի որոշ այլ խոշոր քաղաքներում գտնվող աֆղանական զորքերը բերվել են մարտական պատրաստվածության:
ԱՄՆ նախագահ Ջո Բայդենը վերջերս հայտարարել է, որ ամերիկյան զորքերը մինչև 2021 թվականի սեպտեմբերի 11-ը դուրս կգան Աֆղանստանից: