Ադրբեջանը կավելացնի դեպի Թուրքիա գազի արտահանման ծավալները

Ադրբեջանը Թուրքիայի պահանջարկին համապատասխան կավելացնի դեպի այդ երկիր գազի արտահանման ծավալները:

Թուրքական TRT հեռուստաընկերության փոխանցմամբ՝ Ադրբեջանի Հանրապետության նավթընկերության (SOCAR) խոսնակ Էբրահիմ Ահմադովն ասել է. «Իրանից  Թուրքիա գազի արտահանման ոլորտում որոշակի տեխնիկական խնդիրների պատճառով  Անկարան դիմել է Ադրբեջանին, խնդրելով ավելացնել գազի մատակարարման ծավալները, մինչև իրանական կողմը կհաղթահարի ժամանակավոր տեխնիկական խնդիրները»։

Ահմադովը հավելել է.«Բաքուն մտադիր է  դեպի Թուրքիա գազի արտահանման ծավալներն ավելացնելով օգնել Անկարային»: 

 Թուրքական «Բութաշ» ընկերությունը հայտարարել է, որ հունվարի 17-ից Իրանի գազի ազգային ընկերության (NIGC) կողմից մատակարարվող գազի ճնշումը նվազել է:

Նշելով, որ ճնշման այս անկման պատճառը տեխնիկական խնդիրն է, Իրանի գազի ազգային ընկերությունն ընդգծել է, որ շուտով այդ խնդիրը կլուծվի, և պայմանագրի կետերը կրկին կիրականացվեն։

Այդ երկրում էներգիայի մատակարարման կրճատման արդյունքում շատ գործարաններ դադարեցրել են իրենց արտադրական աշխատանքը։