Մյունխենում լայնածավալ ակցիա է անցկացվում ՆԱՏՕ–ի դեմ. տեսանյութ
Երթի մասնակիցները մտադիր են խորհրդանշական կերպով «շրջափակել» Մյունխենի խորհրդաժողովը, որպեսզի գերմանական կառավարությանը կոչ անեն դիվանագիտություն օգտագործել և հրաժարվել քաղաքականության սրումից Ուկրաինայի հարցում։
Բավարիայի մայրաքաղաքում խոշոր ցույց է սկսվել քաղաքում անցկացվող Մյունխենյան անվտանգության համաժողովի և ՆԱՏՕ-ի դաշինքի դեմ, ցուցարարները հանդես են գալիս խաղաղ բանակցությունների օգտին և Ուկրաինային ու Իսրայելին զենք մատակարարելու դեմ։ Այս մասին հաղորդում է ՌԻԱ Նովոստիի թղթակիցը:
«Նրանց մտահոգում են ոչ թե մարդկանց անվտանգությունն ու խաղաղ գոյակցությունը, այլ իրենց իշխանության դիրքերն ու կապիտալի պահպանումը»,-ասվում է Մյունխենի ցույցի կազմակերպիչ «ՆԱՏՕ-ի անվտանգության համաժողովի դեմ գործողությունների դաշինքի» (Aktionsbündnis gegen die NATO-Sicherheitskonferenz) հայտարարության մեջ:
Կազմակերպիչներն ընդգծում են, որ Արևմուտքի այսպես կոչված գլոբալ գերակայությունը հիմնված է աշխարհի իմպերիալիստական բաժանման վրա և բազմաթիվ հակամարտությունների է հանգեցրել ամբողջ աշխարհում:
Ընդ որում, Գերմանիայի կառավարությունն ավելի ու ավելի է ռազմականացվում և անտեսում է խաղաղ քաղաքականություն վարելու հանրային ահանջը։ Դաշինքը նաև դեմ է Գերմանիայում ԱՄՆ հրթիռներ տեղակայելու վերաբերյալ գերմանական կառավարության ծրագրերին:
«Դա ինչ սուտ է, թե Ռուսաստանն իբր պատրաստ չէ բանակցությունների, բայց ռուսական իշխանությունների ներկայացուցիչների փոխարեն հրավիրում են ընդդիմադիր քաղաքական գործիչների»,-իր ելույթում հայտարարել է ակցիայի կազմակերպիչներից մեկը:
Ցույցը մեկնարկել է Մյունխենի կենտրոնական Կարլսպլաց հրապարակում, այնուհետև ցուցարարները բողոքի երթով կհասնեն մինչև անվտանգության ֆորումի անցկացման վայրի շրջափակման պարագծին։ Ոստիկանության գնահատականներով՝ ցույցին մի քանի հազար մարդ է մասնակցում։ Ցուցարարներն իրենց հետ բերել են Պաղեստինի բազմաթիվ դրոշներ, պաստառներ` կոչ անելով խաղաղություն հաստատել ամբողջ աշխարհում, հրաժարվել Ուկրաինային և Իսրայելին զենք մատակարարելուց:
Երթի մասնակիցները մտադիր են խորհրդանշական կերպով «շրջափակել» Մյունխենի խորհրդաժողովը, որպեսզի գերմանական կառավարությանը կոչ անեն դիվանագիտություն օգտագործել և, ինչպես բեմից հայտարարել է կազմակերպիչներից մեկը՝ հրաժարվել քաղաքականության սրումից Ուկրաինայի հարցում։
Ինչպես ՌԻԱ Նովոստիին հայտնել են Մյունխենի ոստիկանության մամուլի ծառայությունից, ցույցի և համաժողովի շուրջ իրավակարգի պահպանման համար հինգ հազար աշխատակից են ներգրավել Բավարիայից, Գերմանիայի մերձակա հողերից և նույնիսկ Ավստրիայից:
Մյունխենում փետրվարի 14-16-ը տեղի է ունենում անվտանգության 61-րդ համաժողովը, որտեղ տարբեր երկրների բարձրաստիճան պետական գործիչներ քննարկում են արտաքին քաղաքականության ոլորտում առկա մարտահրավերներն ու խնդիրները, այդ թվում՝ ուկրաինական և մերձավորարևելյան հակամարտությունները: