Իրանը` BRICS միջանցքների ռազմավարական առանցք և Եվրասիական շուկաների կապող օղակ
Իրանի Իսլամական Հանրապետության ճանապարհների և քաղաքաշինության նախարարը, ընդգծելով երկրի աշխարհաքաղաքական դիրքը, հայտարարեց, որ Իրանի տարանցիկ միջանցքները կարող են բազմապատիկ բարձրացնել BRICS անդամ երկրների տրանսպորտի և առևտրի արդյունավետությունը:
Ֆարզանե Սադեղը նշեց, որ Իրանը, իր երկաթուղային, ավտոճանապարհային և ծովային ցանցերով, պատրաստ է, որպես անվտանգ, կայուն և ցածրարժեք կամուրջ, BRICS անդամների մատակարարման շղթաները կապել տարածաշրջանային և համաշխարհային շուկաների հետ։ Նա նաև հայտնեց վնասված տրանսպորտային ենթակառուցվածքների արագ վերականգնման և ռազմավարական երթուղիներով երթևեկության անխափան շարունակության մասին:
«Pars Today»-ի փոխանցմամբ՝ Իրանի ճանապարհների և քաղաքաշինության նախարարը, անդրադառնալով Հյուսիս-Հարավ, Արևելք-Արևմուտք միջանցքների և Պարսից ծոց-Սև ծով երթուղու կարևորությանը, այդ երթուղիները համարեց Ասիայի, Կովկասի, Եվրոպայի և Հնդկական օվկիանոսի միջև առևտրի ամրապնդման գործոն: Նա Ռաշտ-Աստարա երկաթուղին և Չաբահար նավահանգիստը ներկայացրեց որպես BRICS համագործակցության հիմնական նախագծեր և առաջարկեց ստեղծել միջանցքների համակարգման, կանաչ միջանցքի զարգացման և տրանսպորտային ցանցերը էներգետիկ ու կապի ենթակառուցվածքների հետ ինտեգրելու մշտական խորհուրդ։ Սադեղը ընդգծեց, որ Իրանը պատրաստ է Ռուսաստանի, Հնդկաստանի, Չինաստանի և BRICS-ի մյուս անդամների հետ տարանցիկ համագործակցությունը վերածել գործնական և կայուն համաձայնագրերի։