Մոսկվան ցավակցություն է հայտնել Անկարայի ահաբեկչության առնչությամբ
Մոսկվան ցավակցություն է հղել Թուրքիայի մայրաքաղաք Անկարայում տեղի ունեցած վերջին ահաբեկչության առնչությամբ, տեղեկացնում է Взгляд-ը։
«Փետրվարի 17-ին Անկարայում տեղի ունեցած ահաբեկչական գործողության առնչությամբ խոր ցավակցություն ենք հայտնում թուրք ժողովրդին։ Անկեղծորեն ցավակցում ենք զոհերի հարազատներին ու մերձավորներին։ Շուտափույթ առողջություն ենք մաղթում այդ հրեշավոր գործողության հետևանքով տուժածներին»,-ասված է ՌԴ արտգործնախարարության տարածած հաղորդագրության մեջ։
«Բարբարոսական հանցագործություններն արդարացում ունենալ չեն կարող։ Դրա կազմակերպիչները պետք է պատասխան տան։ Տեղի ունեցածը ևս մեկ անգամ ցույց է տալիս, որ բոլոր պետությունները պետք է միասնական լինեն ահաբեկչության դեմ պայքարում»,-հավելել են գերատեսչությունից։
Ավելի վաղ հաղորդվել էր, որ Թուրքիայի նախագահ Ռեջեփ Թայիփ Էրդողանն Անկարայում տեղի ունեցած պայթյունից հետո հետաձգել է Ադրբեջան կատարելիք այցը:
Հիշեցնենք, որ պայթյունը որոտացել է երեկ՝ երևանյան ժամանակով 20:30-ին Անկարայի կենտրոնական թաղամասում` զինվորական հանրակացարանի մոտակայքում: Հաղորդվում էր, որ ոստիկանների տեղափոխող մեքենա է պայթեցվել:
