Parlamenti italian miratoi marrëveshjen e migracionit me Shqipërinë
Parlamenti i Italisë ka miratuar marrëveshjen e diskutueshme të qeverisë për imigracionin me Shqipërinë për të përballuar fluksin e emigrantëve.
Sipas gazetës gjermane “De Welt”, Dhoma e Përfaqësuesve italianë miratoi të mërkurën marrëveshjen mes qeverisë së këtij vendi dhe Shqipërisë për akomodimin e emigrantëve ndërkohë që do të shqyrtohen kërkesat e tyre për azil. Propozimi kaloi me 155 vota kundrejt 115 kundër dhe dy abstenime dhe tani shkon në Senat, ku qeveria e djathtë e kryeministres Georgia Meloni ka shumicën. Kryeministrja italiane Giorgia Meloni dhe homologu i saj shqiptar Edi Rama njoftuan nismën nëntorin e kaluar. Shqipëria më pas do të strehojë deri në 36,000 emigrantë në dy qendra për një vit, ndërsa Italia i përpunon kërkesat e tyre për azil me një proces të shpejtë. Në dhjetor, Gjykata Kushtetuese e Shqipërisë pezulloi marrëveshjen në pritje të një shqyrtimi kushtetues. Italia ka kërkuar prej kohësh ndihmë nga vendet e tjera të BE-së për të akomoduar dhjetëra mijëra emigrantë që mbërrijnë çdo vit. Shqipëria shpreson të anëtarësohet në Bashkimin Evropian dhe Italia e ka mbështetur fuqimisht ofertën e saj. Presidentja e Komisionit të BE-së, Ursula von der Leyen e përshëndeti marrëveshjen si një nismë të rëndësishme për të trajtuar migracionin. Megjithatë, opozita italiane e përshkroi marrëveshjen si një ushtrim të kushtueshëm publiciteti përpara zgjedhjeve evropiane të këtij viti dhe një përpjekje të turpshme për ta kthyer Shqipërinë në Guantanamo të Italisë. Sipas kësaj marrëveshjeje, në Shqipëri do të ndërtohen dy qendra pritjeje me financim italian. Rreth 3000 emigrantë të shpëtuar nga roja bregdetare italiane në Mesdhe janë strehuar përkohësisht, ndërsa presin një vendim për çështjen e tyre të azilit. Në Shqipëri partitë opozitare thanë se kjo marrëveshje shkel standardet ndërkombëtare për të drejtat e azilkërkuesve dhe është “e rrezikshme” edhe për sigurinë e vendit. Gjykata Kushtetuese e Shqipërisë po shqyrton marrëveshjen dhe kërkon të marrë një vendim brenda datës 6 mars.
