OKB paralajmëron mbi pasojat e acarit tek emigrantët

OKB ka paralajmëruar mbi pasojat e acarit tek emigrantët që gjenden pranë kufijve të Evropës.

Refugjatët dhe emigrantët po rrezikojnë të vdesin nga vala e të ftohtit dhe qeveritë duhet të bëjnë më shumë për t’i ndihmuar ata, në vend që t’i largojnë nga kufijtë dhe t’i ekspozojnë ndaj dhunës. Thirrja vjen nga agjencia e OKB-së për refugjatët, UNHCR. Jemi ekstremisht të shqetësuar nga lajmet për vdekjen e disa refugjatëve dhe emigrantëve në përpjekjen për të hyrë apo për t’u zhvendosur rreth Evropës, në mes të të ftohtit të acartë, tha Cecile Pouilly, zëdhënëse e UNHCR-së. Në Serbi, rreth 80 për qind e 7.300 refugjatëve dhe azilkërkuesve po qëndrojnë në vendstrehime qeveritare të pajisura me ngrohje, por 1.200 burra flenë nëpër magazina të braktisura. Trupat e dy irakianëve dhe një gruaje somaleze u gjetën pranë kufirit turk në Bullgari dhe dy adoleshentë somalezë u shtruan në spital, pas 5 ditëve të kaluara në pyll. Trupi i një të riu palestinez u gjet përgjatë të njëjtës vije kufitare në fund të dhjetorit, siç thotë UNHCR-ja, e një tjetër 20-vjeçar humbi jetën në përpjekjen për të kaluar lumin Evros në kufirin tokësor mes Greqisë dhe Turqisë, kur temperaturat ishin nën -10 gradë Celsius. Përfaqësuesja e UNHCR-së shtoi më tej se rreth 1.000 vetë, përfshirë fëmijë, po qëndronin në tenda pa ngrohje në ishullin grek të Samos, duke bërë thirrje për transferimin e tyre në kontinent. Shumë emigrantë dëshmojnë se ndaj tyre është ushtruar dhunë dhe se u janë konfiskuar ose shkatërruar telefonat, çfarë i ka penguar të kërkojnë ndihmë.