Shuhet Fadil Vokrri, e diela ditë zie në Kosovë

Presidenti i Republikës së Kosovës, Hashim Thaçi, ka shpallur të dielën, 10 qershor 2018, ditë zie në Kosovë, në nderim të Fadil Vokrrit, i cili sot ndërroi jetë.

Në shenjë respekti shtetëror dhe qytetar, me vendim të presidentit Thaçi, nesër flamujt shtetëror do të ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit, thuhet në njoftimin e Presidencës. Kryetari i Federatës së Futbollit të Kosovës nuk i ka mbijetuar sulmit në zemër që ka pësuar në mëngjesin e sotëm. Ai është dërguar pa shenja jeta në Qendrën Klinike Universitare të Kosovës. Pas këtij lajmi të hidhur ka reaguar dhe FIFA, me presidentin e saj Gianni Infantino që ka shprehur ngushëllimet e tij për familjen Vokrri.