Kina premton përgjigje pas njoftimit të Trump për tarifën e re 10%

Kina ka paralajmëruar Shtetet e Bashkuara të Amerikës për masa reciproke nëse administrata e Presidentit Donald Trump vazhdon me vendosjen e tarifës shtesë prej 10% për mallrat kineze, e cila ka për qëllim të përgjigjet ndaj kontrabandës së fentanyl-it.

Tarifa e re prej 10%, e shpallur të enjten nga Trump, vjen mbi një taksë të ngjashme prej të njëjtës normë të vendosur më herët gjatë këtij muaji ndaj importeve kineze.

Përveç kësaj, Trump përdori këtë mundësi për të shpallur tarifa të gjera prej 25% për mallrat nga Meksika dhe Kanadaja, të cilat ishin pezulluar në janar.

Një delegacion meksikan aktualisht po negocion një marrëveshje me SHBA-në në Washington.

Gjithashtu, Kryeministri kanadez Justin Trudeau ka shpallur planet për një përgjigje të menjëhershme nëse përpjekjet e vendit të tij për të shmangur tarifat e SHBA-së dështojnë deri javën e ardhshme.

Pauza njëmujore për Kanadanë dhe Meksikën pritet të përfundojë më 4 mars.

Në përgjigje të pyetjeve të gazetarëve, Trump njoftoi përmes mediave sociale të enjten se për sa kohë fluksi i fentanyl-it në SHBA do të vazhdojë, tarifat do të mbeten të paprekura dhe do të zbatohet më 4 mars.

Pekini ka dënuar akuzat e Trump-it, duke deklaruar përmes ministrisë së tij të tregtisë se Washingtoni është thjesht duke e hedhur fajin diku tjetër.

"Kina është një nga vendet me politikat më të rrepta dhe më të hollësishme antidrogë në botë," thuhet në deklaratë. "Por pala amerikane gjithmonë i ka injoruar këto fakte," shtohet në të.

Kina beson se kjo qasja e re e tarifave nga SHBA do të rrisë barrën mbi kompanitë dhe konsumatorët amerikanë dhe do të dëmtojë stabilitetin e zinxhirit global industrial, gjithashtu do të ndikojë seriozisht bisedimet midis dy vendeve për kontrollin e drogave.

Ndërkohë, duke e quajtur lëvizjen e Washingtonit shantazh, Ministria e Jashtme e Kinës theksoi se SHBA po bën një gabim duke përdorur presion, shantazh dhe kërcënime në marrëdhëniet me Kinën.

Pekini ka hedhur poshtë shqetësimet e SHBA-së mbi fentanyl-in, duke pohuar se SHBA duhet ta zgjidhë vetë problemin e saj me drogën.

Një raport i Shërbimit të Kërkimit të Kongresit të SHBA-së vitin e kaluar vuri në dukje se fentanyli që arrin në SHBA duket se prodhohet në Meksikë duke përdorur lëndë ndihmëse kineze.

Trump gjithashtu ka njoftuar, përmes platformës së tij Truth Social, se tarifat reciproke, të përshtatura për çdo partner tregtar të SHBA-së, do të hyjnë në fuqi më 2 prill. Ai ka udhëzuar agjencitë e qeverisë për të studiuar çështjet tregtare të përcaktuara në udhëzimet e tij, një veprim që Kina e beson se është veçanërisht i drejtuar kundër saj.

Kina ka planifikuar të mbajë një takim javën e ardhshme për të përcaktuar hapat që do të ndjekë përballë kërcënimeve të reja nga Washingtoni.