Britania, Franca, Gjermania dhe Italia mbështesin nismën arabe për rindërtimin e Gazës

Në një deklaratë të përbashkët, katër vende evropiane, Britania, Franca, Gjermania dhe Italia, përshëndetën iniciativën e vendeve arabe për rindërtimin e Gazës, e cila, në kundërshtim me propozimin e presidentit amerikan Donald Trump, nuk përfshin opsionin e zhvendosjes me forcë të palestinezëve.

Sipas ISNA, ministrat e jashtëm të Francës, Gjermanisë, Italisë dhe Britanisë së Madhe njoftuan sot se mbështesin planin e vendeve arabe për rindërtimin e Gazës, i cili kushton 53 miliardë dollarë dhe shmang zhvendosjen e popullsisë palestineze të qytetit.

Agjencia e lajmeve Reuters, duke publikuar një artikull, shkruante se ministrat e jashtëm të këtyre vendeve në një deklaratë të përbashkët deklaruan: "Ky plan tregon një rrugë realiste për rindërtimin e Gazës që, nëse zbatohet, premton një përmirësim të shpejtë dhe të qëndrueshëm të kushteve katastrofike për palestinezët që jetojnë në Gaza".

Edhe Organizata e Bashkëpunimit Islamik të shtunën në mëngjes pranoi zyrtarisht kundërpropozimin e Ligës Arabe ndaj planit të presidentit amerikan Donald Trump për të pushtuar Gazën dhe për të zhvendosur banorët e saj dhe i bëri thirrje komunitetit ndërkombëtar të mbështesë nismën rajonale.

Ky plan, i hartuar nga Egjipti dhe i miratuar nga krerët e vendeve arabe, është hedhur poshtë nga regjimi izraelit dhe presidenti i SHBA-së, Donald Trump, i cili kishte sugjeruar që banorët e Gazës të migrojnë përgjithmonë nga qyteti në vendet e huaja për të ofruar mundësinë e rindërtimit të Gazës dhe shndërrimit të saj në një qytet bregdetar turistik.