AEOI: Infiltrimi në emailet e filialeve thjesht veprim pa vlerë

Organizata e Energjisë Atomike e Iranit (AEOI) deklaroi se infiltrimi i fundit në serverin e postës elektronike të një prej filialeve të saj nuk ka asnjë vlerë dhe ishte vetëm një veprim i paligjshëm i kryer nga dëshpërimi i autorëve.

Deklarata e së dielës e AEOI erdhi një ditë pasi një grup hakerash pretendoi se kishte depërtuar në serverët e organizatës dhe më pas kishte nxjerrë informacionin e saj. Organizata e Energjisë Atomike e Iranit tha se pretendimet që qarkullonin në internet për infiltrimin në serverin e postës elektronike të Kompanisë për Prodhimin dhe Zhvillimin e Energjisë Bërthamore të Iranit (NPPD) ishin vetëm një lëvizje për të tërhequr vëmendjen. “Është e qartë se qëllimi pas përpjekjeve të tilla të paligjshme, të cilat burojnë nga dëshpërimi i autorëve të tyre, është tërheqja e vëmendjes së publikut, krijimi i një atmosfere mediatike dhe nisja e operacioneve psikologjike anti-iraniane,” tha AEOI  duke shtuar se një lëvizje e tillë nuk ka asnjë vlerë tjetër. AEOI shpjegoi se emailet e zbuluara nuk ishin gjë tjetër veçse mesazhe teknike dhe komunikime të zakonshme. Sipas një raporti nga NPPD, qasja e paautorizuar në serverin e postës elektronike të saj erdhi nga një vend i huaj dhe çoi në rrjedhjen e përmbajtjes së disa prej emaileve të kompanisë. "Pas këtij incidenti, departamenti i teknologjisë së informacionit të NPPD ... ekzaminoi aspekte të ndryshme të tij dhe ofroi raportin e tij paraprak tek zyrtarët e Organizatës së Energjisë Atomike të Iranit," thuhet në deklaratë.