Irani mohon arritjen e “marrëveshjes së përkohshme” me SHBA-në

Teherani ka hedhur poshtë raportet se Irani dhe Shtetet e Bashkuara po arrijnë një "marrëveshje të përkohshme" që parashikon disa lehtësime sanksionesh për Republikën Islamike në këmbim të ndryshimeve në programin paqësor të energjisë bërthamore të vendit.

Misioni i Iranit në OKB i bëri komentet të enjten pasi uebsajti i lajmeve dhe analizave  i Middle East Eye me qendër në Londër pretendoi se dy vendet ishin afër arritjes së një marrëveshjeje të tillë pas stagnimit të bisedimeve për ringjalljen e marrëveshjes bërthamore. SHBA u largua nga marrëveshja bërthamore me Iranin në vitin 2018 nën ish-presidentin Donald Trump, duke i kthyer të gjitha sanksionet që kishte hequr marrëveshja. Negociatat për ringjalljen e marrëveshjes nisën në prill të vitit 2021. Megjithatë, bisedimet kanë ngecur pas refuzimit të Uashingtonit për të ofruar garanci se nuk do ta anulonte sërish marrëveshjen. "Nuk ka asnjë marrëveshje të përkohshme që synon të zëvendësojë marrëveshjen bërthamore," tha misioni iranian në Kombet e Bashkuara, duke shtuar se asnjë marrëveshje e tillë nuk është në axhendë. Gjithashtu të enjten, një zëdhënës i Këshillit të Sigurisë Kombëtare të Shtëpisë së Bardhë hodhi poshtë në mënyrë të ngjashme raportin e MEE, duke e quajtur atë të rremë dhe devijues.