Ministri i Jashtëm saudit të shtunën do të vijë në Teheran

Ministri i Jashtëm saudit do të vizitojë Teheranin për t'u konsultuar me zyrtarët e Republikës Islamike.

Sipas një raporti të cituar nga Al-Arabiya, Ministria e Jashtme saudite njoftoi se "Faisal Bin Farhan", ministri i Jashtëm i këtij vendi, do të udhëtojë në Teheran për të takuar dhe biseduar me zyrtarë të Republikës Islamike të Iranit. Faisal bin Farhan së fundmi gjatë takimit me homologun e tij iranian Hossein Amirabdollahian në Cape Toën të Afrikës së Jugut, tha se së shpejti do të vizitojë Iranin. Më herët, gazeta Rai Today raportoi se princi Faisal bin Farhan Al Saud së shpejti do të përcjellë një mesazh të mbretit Salman bin Abdulaziz të Arabisë Saudite, për Ibrahim Raisi, presidentin e Iranit.  Thuhet se ky mesazh do të jetë për zhvillimin e marrëdhënieve mes dy vendeve. Gjatë këtij udhëtimi, Bin Farhan pritet të takohet me Presidentin e Iranit dhe zyrtarë të tjerë iranianë me të cilët do të diskutojë për zhvillimin e marrëdhënieve mes dy vendeve. Ky lajm u bë i ditur në të njëjtën kohë kur ministri i Jashtëm saudit u takua me homologun e tij iranian, Hussein Amir Abdollahian, në margjinat e takimit ministror të BRICS në Afrikën e Jugut. Më 10 mars 2023 Irani dhe Arabia Saudite ranë dakord për rifillimin e marrëdhënieve diplomatike pas shtatë vjetësh e tre muajsh ndërprerjeje.  Ambasada e Republikës Islamike të Iranit në Riad dhe Konsullata e Përgjithshme e Republikës Islamike të Iranit në Jeddah dhe Përfaqësuesia  e Përhershme e Iranit në Organizatën e Bashkëpunimit Islamik u rihapën zyrtarisht të martën, më 6 qershor dhe të mërkurën, më 7 qershor.