Ambasadori i ri i Iranit në Arabinë Saudite mbërrin në Riad

Ambasadori i ri i Iranit në Arabinë Saudite, Alireza Enajati ka mbërritur në Riad për të nisur misionin e tij diplomatik të shumëpritur, pas rivendosjes së marrëdhënieve diplomatike midis dy fuqive rajonale.

Enajati mbërriti të martën në kryeqytetin Riad dhe u prit nga zyrtarë të Ministrisë së Punëve të Jashtme të Arabisë Saudite dhe kolegët e tij në Ambasadën e Republikës Islamike të Iranit. Para nisjes për në Arabinë Saudite, Enajati u takua me ministrin e Jashtëm Hossein Amir-Abdollahian dhe prezantoi një raport mbi planet për avancimin e lidhjeve dypalëshe mes dy vendeve. Ai kishte shërbyer më parë si zëvendës ambasador i Iranit në Riad, ambasador i Iranit në Kuvajt, si dhe ndihmës i ministrit të jashtëm dhe drejtor i përgjithshëm i çështjeve të Gjirit Persik në Ministrinë e Jashtme të Iranit. Irani rihapi zyrtarisht ambasadën e tij në Riad në qershor. Ambasada saudite në Teheran dhe konsullata e saj në Mashhad gjithashtu kanë rifilluar punën. Muajin e kaluar, ministri i Jashtëm iranian Amir-Abdollahian vizitoi Arabinë Saudite, ku zhvilloi bisedime “të sinqerta dhe të frytshme” me princin e kurorës saudite Mohammed bin Salman.