Irani nis një projekt të madh hekurudhor në shkretëtirat lindore

Punimet e ndërtimit për një projekt të madh hekurudhor në rajonet e thata lindore të Iranit kanë nisur sot me urdhër të Presidentit iranian Ebrahim Raisi.

Projekti që filloi të mërkurën do të lidhë qytetet Nehbandan me Yunesi në provincën e Khorasanit Jugor me një hekurudhë që shtrihet rreth 400 kilometra në shkretëtirat e thata përgjatë kufirit të Iranit me Afganistanin. Presidenti Raisi në një fjalim në kryeqytetin e provincës Birxhand tha se hekurudha do të luajë një rol të madh në fuqizimin ekonomik të rajonit, duke shtuar se qeveria ka ndarë të gjitha burimet financiare dhe teknike të nevojshme për përfundimin e projektit. Lidhja hekurudhore Nehbandan-Yunesi kalon nëpër Birxhand dhe disa qytete të mëdha në Khorasanin e Jugut dhe është pjesë e një korridori hekurudhor prej 910 kilometrash midis Zahedanit, në juglindje, dhe Mashhadit në Iranin verilindor. Kreu i departamentit lokal të ministrisë iraniane të transportit në Birxhand, Mir Mohammad, tha se Lideri Suprem i Revolucionit Islamik Ajetollah Seyyed Ali Khamenei kishte miratuar një kërkesë të qeverisë për të përdorur 360 milionë dollarë për të financuar projektin hekurudhor në rajon. Irani ka një plan ambicioz për të lidhur portin e tij Chabahar në Detin e Omanit nëpërmjet hekurudhave me vendet pa dalje në det në Azinë Qendrore. Projekti do të rrisë ndjeshëm kapacitetin e tranzitit të ngarkesave të Iranit nëpërmjet Korridorit Ndërkombëtar të Transportit Veri-Jug (INSTC).