Shefat e diplomacisë të Iranit dhe BE takohen në Nju Jork

Ministri i Jashtëm i Iranit dhe shefi i politikës së jashtme të BE-së kanë diskutuar mënyrat për të vazhduar bisedimet për ringjalljen e marrëveshjes bërthamore të vitit 2015, të cilat janë pezulluar për më shumë se një vit për shkak të mosmarrëveshjeve të vazhdueshme midis Iranit dhe SHBA-së.

Në një takim të mërkurën në margjinat e Asamblesë së Përgjithshme të OKB-së në Nju Jork, Hossein Amir-Abdollahian dhe Josep Borrell  "theksuan rëndësinë e vazhdimit të dialogut dhe zbatimin e plotë të angazhimeve nga të gjitha palët në marrëveshjen bërthamore ", thuhet në një deklaratë të Ministrisë së Jashtme iraniane. Kjo ministri tha se shefi i politikës së jashtme të BE-së, i cili vepron si koordinator i bisedimeve të ringjalljes së marrëveshjes bërthamore, theksoi gatishmërinë e tij për të ndjekur bisedimet dhe për të mbajtur konsultimet e nevojshme. “Palët treguan interes për të ndërmarrë veprime konkrete bazuar në një kornizë të rënë dakord dhe për të vendosur sa më shumë mirëkuptim të ndërsjellë”, thuhet në deklaratë. Gjatë takimit, Borrell ngriti çështjen e ndalimit të shtetasve të BE-së në Iran, nevojën për të gjetur një zgjidhje diplomatike për çështjen bërthamore dhe bashkëpunimin ushtarak me Rusinë. Duke shqyrtuar zhvillimet e fundit në lidhje me heqjen e sanksioneve, të dyja palët shkëmbyen mendime për hapat e fundit të propozuar. Ndërkohë, Bashkimi Evropian si koordinator i bisedimeve bërthamore shprehu gatishmërinë e tij për ndjekje serioze të bisedimeve.