Presidenti i Iranit kërkon veprim global për ndihmën humanitare të Gazës
Presidenti i Iranit u ka bërë thirrje organizatave ndërkombëtare që të përpiqen për rritjen e shpërndarjes së ndihmës humanitare në Rripin e Gazës të goditur nga lufta dhe të intensifikojnë përpjekjet për të kapërcyer pengesat e krijuara nga regjimi izraelit.
Në një deklaratë me rastin e Ditës Botërore të Kryqit të Kuq dhe Gjysmëhënës së Kuqe, Raisi u ankua se regjimi izraelit po pengon dërgimin e ndihmave humanitare me qëllim për të zgjatur vuajtjet e banorëve të Gazës.
"Këtë vit ne përkujtojmë Ditën Botërore të Kryqit të Kuq dhe Gjysmëhënës së Kuqe ndërsa banorët e Gazës po jetojnë në kushtet më të vështira pa akses në ujë, ushqime, ilaçe dhe objekte bazë mjekësore dhe sanitare. Ofrimi i ndihmës dhe shërbimeve të nevojshme për këta njerëz fatkeqësisht është përballur me pengesa nga regjimi sionist, pavarësisht se shoqata e Gjysmëhënës së Kuqe e vendit tonë si anëtare e kësaj familjeje të madhe dhe vende të tjera në mbarë botën kanë shprehur gatishmërinë për të ndihmuar”, theksoi Presidenti i Iranit.
“Është thellësisht për keqardhje që as anëtarët e kësaj shoqërie nuk janë kursyer nga agresioni i pamëshirshëm i këtij regjimi kriminel”, tha Presidenti Raisi, duke dënuar sulmet e shpeshta izraelite ndaj punonjësve të ndihmës në Gaza.
“Me këtë rast të nderimit të Ditës Botërore të Kryqit të Kuq dhe Gjysmëhënës së Kuqe, shfrytëzoj rastin t'i bëj thirrje edhe një herë komunitetit ndërkombëtar dhe gjithë ndërgjegjes njerëzore që të ndihmojë popullin e shtypur të Gazës dhe të lehtësojë dërgimin e ndihmave humanitare dhe zbutjen e vuajtjeve njerëzore të popullit të Gazës”.
