Flotilja detare e IRGC-së kthehet pas misionit në Hemisferën jugore

Flota e pestë e Marinës së Korpusit të Gardës së Revolucionit Islamik të Iranit (IRGC) është kthyer në Iran pasi përfundoi një mision që zgjati 39 ditë në Hemisferën jugore.

Flota detare, me luftanijen trans-oqeanike Shahid Mahdavi e prodhuar në vend, u ankorua në qytetin jugor Bandar Abbas të shtunën pasi udhëtoi mijëra kilometra në ujërat ndërkombëtare.

"Kjo është hera e parë që ushtarakët e guximshëm të Marinës së IRGC kanë qenë në gjendje të kalojnë Ekuatorin dhe të hyjnë në Hemisferën Jugore," tha komandanti i Marinës së IRGC, kundëradmirali Alireza Tangsiri, teksa iu drejtua një ceremonie për të përshëndetur mbërritjen e flotiljes.

Ai e cilësoi unitetin dhe koordinimin midis Forcave të Armatosura të Republikës Islamike të Iranit si çelësin e arritjeve të tilla, duke theksuar se Marina e Republikës Islamike të Iranit dhe Marina e IRGC, falë besimit në Zot, vendosmërisë së çeliktë si dhe aftësive ushtarake të sofistikuara dhe parandaluese, janë kthyer në një makth absolut për armiqtë rajonalë dhe transrajonalë.

Komandanti i Marinës së IRGC-së theksoi më tej se prania e ushtarakëve të forcave të tij dhe të Marinës së Republikës Islamike të Iranit në ujërat ndërkombëtare ka hapur horizonte të reja për njësitë detare iraniane.