Irani, Rusia dhe Turqia dënojnë krimet e Izraelit në Azinë Perëndimore

Irani, Rusia dhe Turqia kanë dënuar krimet e vazhdueshme të regjimit izraelit në rajonin e Azisë Perëndimore, duke bërë thirrje për rritjen e përpjekjeve ndërkombëtare për të siguruar një armëpushim të menjëhershëm dhe të përhershëm në Gaza.

Një deklaratë përmbyllëse nga tre vendet pas takimit të 22-të ndërkombëtar për Sirinë në formatin e Astanasë, të mbajtur në kryeqytetin e Kazakistanit, shprehu dënimin e tyre të fortë dhe shqetësimin e thellë për vrasjet masive dhe sulmet kriminale të Izraelit në Gaza, si dhe agresionin izraelit në Liban dhe në Bregun Perëndimor”.

Ata i bënë thirrje komunitetit ndërkombëtar, veçanërisht Këshillit të Sigurimit të OKB-së, "të sigurojë një armëpushim të menjëhershëm dhe të përhershëm dhe qasje të papenguar humanitare në Gaza".

Treshja dënoi gjithashtu sulmet ushtarake izraelite në Siri, duke i konsideruar veprime të tilla si shkelje të ligjit ndërkombëtar.

"Irani, Rusia dhe Turqia dënuan të gjitha sulmet ushtarake izraelite në Siri. Ata i konsideruan këto veprime si shkelje të së drejtës ndërkombëtare, ligjit humanitar ndërkombëtar, sovranitetit dhe integritetit territorial të Sirisë dhe i cilësuan ato si destabilizuese dhe nxitëse të tensioneve në rajon dhe bënë thirrje për ndërprerjen e këtyre sulmeve”, thuhet në deklaratë.

Në deklaratë thuhet se palët riafirmuan rëndësinë e rifillimit të kontakteve midis Turqisë dhe Sirisë në bazë të parimeve të respektimit të unitetit, integritetit territorial dhe sovranitetit të të dy vendeve.