Irani prezanton raketën e re balistike të quajtur Etemad

Irani ka prezantuar një raketë të re balistike të quajtur Etemad, që do të thotë "besim" në persisht, e aftë për të udhëtuar 1700 kilometra.

Raketa u prezantua të dielën gjatë një ceremonie në Teheran, ku mori pjesë edhe Presidenti Masoud Pezeshkian.

Etemad është raketa më e fundit balistike e zhvilluar nga Ministria iraniane e Mbrojtjes. Ajo ka një gjatësi prej 16 metrash dhe një diametër prej 1.25 metrash. Ajo ka një kokë luftarake të drejtuar që mund ta drejtojë raketën deri në goditje.

Presidenti i Iranit Masoud Pezeshkian u njoh sot me arritjet më të fundit të mbrojtjes dhe hapësirës të Ministrisë së Mbrojtjes.

Vizita u zhvillua të dielën në Agjencinë Hapësinore Iraniane për të shënuar Ditën Kombëtare të Teknologjisë Hapësinore.

Gjatë vizitës, Pezeshkian bisedoi me ekspertë të industrisë iraniane të mbrojtjes dhe hapësirës dhe u njoh me përparimet më të fundit teknologjike, duke përfshirë transportuesin satelitor Simorgh.

Presidenti Pezeshkian përshëndeti arritjet e mbrojtjes të Iranit, duke thënë se fuqia ushtarake e vendit synon vetëmbrojtje dhe nuk përbën kërcënim për vendet e tjera.

"Zhvillimi i aftësive mbrojtëse dhe hapësinore të Iranit nuk është për të bërë luftë ose për të pushtuar ndonjë vend, por për parandalim dhe për të siguruar që asnjë vend të mos guxojë të sulmojë territorin iranian apo as të mendojë për këtë," u tha ai gazetarëve në margjinat e vizitës.

"Ajo që po shohim sot për arritjet e mbrojtjes dhe hapësirës është tregues i fuqisë, inovacionit dhe krijimtarisë së rinisë dhe ekspertëve të vendit, çka është një burim krenarie për kombin iranian," vuri në dukje Presidenti iranian.

Pezeshkian tha se në një moment armiqtë ishin në gjendje të pushtonin vendin lehtësisht. "Sot, megjithatë, me fuqinë e lartë ushtarake dhe mbrojtëse të Iranit, e cila është arritur me përpjekjet e të rinjve dhe ekspertëve të vendit, ata as nuk mund të mendojnë më për pushtimin e tokës iraniane," shtoi ai.

“Irani i dashur do të jetë ndër vendet që do të kryejnë fluturime jashtë atmosferës së Tokës dhe kjo tregon fuqinë shkencore të vendit tonë”, tha ai.