Irani përjashton bisedimet bërthamore me SHBA

Irani nuk do të angazhohet në negociata me Shtetet e Bashkuara për programin e tij bërthamor nëse Shtëpia e Bardhë nuk tërhiqet nga fushata e "presionit maksimal" të rivendosur së fundmi, tha ministri i Jashtëm iranian Abbas Araghchi.

Araghchi foli në një konference shtypi të martën së bashku me homologun e tij rus, Sergej Lavrov i cili vizitoi Teheranin.

Ministri i Jashtëm iranian tha se Irani do ta trajtojë çështjen bërthamore në koordinim me aleatët e tij - Rusinë dhe Kinën.

“Për negociatat bërthamore, qëndrimi i Iranit është shumë i qartë: ne nuk do të negociojmë nën presion, kërcënim dhe sanksione”, shtoi ai.

"Prandaj," tha ministri i jashtëm iranian, "nuk ka asnjë mundësi për negociata të drejtpërdrejta mes nesh dhe Shteteve të Bashkuara për çështjen bërthamore për sa kohë që presioni maksimal vazhdon të ushtrohet në formën e tij aktuale".

Araghchi theksoi diskutimet e tij "të detajuara dhe konstruktive" me Lavrov për një gamë të gjerë temash, veçanërisht në lidhje me Kaukazin, Azinë dhe Euroazinë.

Ministri i Jashtëm iranian vlerësoi përparimin e shpejtë në bashkëpunimin ekonomik midis Teheranit dhe Moskës, duke përmendur bashkëpunimet në energji, hekurudha dhe bujqësi.

Sa i përket Palestinës, Araghchi tha se ata diskutuan planin "e papranueshëm" të Trump që synon zhvendosjen e detyruar të banorëve të Gazës.

Lidhur me Sirinë, ai nënvizoi ngjashmërinë e qëndrimeve iraniane dhe ruse.

“Stabiliteti, paqja, integriteti territorial dhe përparimi në Siri bazuar në vullnetin e popullit të saj janë prioritete për Iranin. Ne mbështesim vendosjen e paqes dhe stabilitetit në këtë vend.”

Nga ana e tij, Lavrov gjatë konferencës për shtyp shtjelloi diskutimet e tij "të detajuara dhe konstruktive" me Araghchi.

Ministri i Jashtëm rus tha se të dyja palët ranë dakord të rrisin bashkëpunimin në kuadër të BRICS.

Lavrov tërhoqi vëmendjen për një rritje të dukshme të tregtisë midis Iranit dhe Rusisë pavarësisht sanksioneve perëndimore.

Shkëmbimet tregtare midis Iranit dhe Rusisë janë rritur me më shumë se 13%, dhe ne shpresojmë se kjo prirje do të vazhdojë, tha ai.

Duke iu drejtuar programit bërthamor të Iranit, Lavrov i dha një premisë diplomacisë.

“Ne besojmë se ka ende kapacitet diplomatik për të zgjidhur çështjen bërthamore të Iranit dhe shpresojmë se mund të gjendet një zgjidhje. Kjo krizë nuk u krijua nga Irani”, theksoi kryediplomati rus.