Si e siguron Irani uraniumin?

Pars Today - Zhvillimet e fundit në fushën e nxjerrjes dhe përpunimit të uraniumit tregojnë se Irani po forcon pozicionin e tij si një vend i pavarur në ciklin e karburantit bërthamor për përdorim paqësor.

Në vitet e fundit, Irani është përpjekur të zhvendosë zinxhirin e vet të furnizimit me uranium nga varësia e huaj në vetëmjaftueshmëri. Ky zhvillim nuk është bërë vetëm në përgjigje të sanksioneve perëndimore, por është gjithashtu pjesë e strategjisë afatgjatë të këtij vendi për të stabilizuar ciklin e karburantit bërthamor.

Ky artikull i agjencisë së lajmeve Pars Today do të përpiqet t'i përgjigjet pyetjes: Si e siguron Irani uraniumin?

Para fitores së Revolucionit

Para fitores së Revolucionit Islamik, Irani u përpoq të siguronte një pjesë të nevojave të tij për uranium nëpërmjet importeve përmes pjesëmarrjes në kompaninë franceze Eurodif dhe investimeve në sipërmarrjen e përbashkët Sofidif. Pavarësisht investimeve të konsiderueshme, pas Revolucionit, Franca refuzoi të furnizonte Iranin me uranium. Ky akt i Francës e ka çuar Iranin të rrisë fokusimin e vet në zhvillimin e brendshëm të burimeve të uraniumit për përdorime paqësore.

Kapacitetet e brendshme

Sipas të dhënave të Organizatës së Energjisë Atomike të Iranit dhe studimeve gjeologjike, Irani ka rezerva të konsiderueshme të uraniumit natyror në provinca të tilla si Yazd, Hormozgan, Kerman, Khorasan-e Razavi dhe Khorasani Jugor, Azerbajxhani Lindor dhe Perëndimor, Fars dhe Lorestan. Minierat aktive si Saghand dhe Khashumi në Yazd dhe Gachin në Bandar Abbas konsiderohen ndër qendrat më të rëndësishme të nxjerrjes së uraniumit në Iran.

Zhvillimi i infrastrukturës

Sipas deklaratave zyrtare të Behrouz Kamalvandi, zëdhënës i Organizatës së Energjisë Atomike të Iranit, kapaciteti i prodhimit të kekut të verdhë (urania, yellowcake, oksid uraniumi) në Iran është rreth 40 ton në vit. Kjo sasi është e mjaftueshme për të furnizuar me karburant termocentralin Bushehr dhe reaktorët kërkimorë. Megjithatë, Irani ka filluar shpimet në 12 miniera të reja që nga viti 2022 dhe ka vendosur një qëllim për të rritur prodhimin vjetor në 71 ton.

Vetëmjaftueshmëria

Lëvizja e Iranit drejt vetëmjaftueshmërisë në furnizimin me uranium nuk është vetëm një përgjigje ndaj kufizimeve ndërkombëtare, por edhe pjesë e një strategjie afatgjatë për të stabilizuar ciklin e karburantit bërthamor. Ky proces do ta vendosë Iranin në një pozicion të tillë që të ketë mundësi për të çuar përpara programet e veta bërthamore pa u varur nga furnizuesit e huaj. Irani gjithmonë ka theksuar përdorimin paqësor të energjisë bërthamore.