BE përkrah fuqishëm marrëveshjen bërthamore

Ministrat e jashtëm të Bashkimit Evropian kanë riafirmuar mbështetjen e tyre për marrëveshjen historike bërthamore midis Iranit dhe vendeve të grupit G5 + 1, duke thënë se marrëveshja po funksionon dhe është një pjesë kyçe e përpjekjeve për mospërhapjen e armëve atomike.

Ministrat e jashtëm të BE zhvilluan të hënën një takim me dyer të mbyllura në Luksemburg, të kryesuar nga shefja e politikës së jashtme të BE, Federica Mogherini, për të diskutuar mënyrën më të mirë për të vazhduar marrëveshjen me Iranin. Takimi erdhi tri ditë pasi Presidenti i SHBA Donald Trump refuzoi të vërtetonte zyrtarisht se Irani po zbatonte marrëveshjen, të njohur si Plani i Përbashkët i Veprimit (JCPOA) dhe paralajmëroi se ai mund të anulojë përfundimisht marrëveshjen. Ndërsa Trump nuk e tërhoqi Uashingtonin nga marrëveshja bërthamore, ai i dha Kongresit amerikan 60 ditë kohë për të vendosur nëse do të vendoste sanksionet ekonomike kundër Teheranit që u hoqën nga marrëveshja. Ri-vendosja e sanksioneve do t'i vinte SHBA-ve në kundërshtim me nënshkruesit e tjerë të marrëveshjes dhe me Bashkimin Evropian. Diplomatët më të lartë të BE u kërkuan ligjvënësve amerikanë të mos vendosnin sanksione mbi Teheranin dhe paralajmëruan kundër pasojave serioze për paqen rajonale të dështimit për të ruajtur marrëveshjen ndërkombëtare të mbështetur nga Këshilli i Sigurimit i OKB. "Si evropianë së bashku, jemi shumë të shqetësuar se vendimi i presidentit amerikan mund të na çojë përsëri në konfrontim ushtarak me Iranin", u tha gazetarëve ministri i jashtëm gjerman Sigmar Gabriel. Pas takimit, ministrat e jashtëm të BE lëshuan një deklaratë, duke shprehur vendosmërinë e tyre për të zbatuar plotësisht marrëveshjen ndërkombëtare bërthamore. "BE është e angazhuar për zbatimin e vazhdueshëm të plotë dhe efektiv të të gjitha pjesëve të marrëveshjes bërthamore", tha deklarata. “Në një kohë të kërcënimit akut bërthamor, BE është e vendosur të ruajë marrëveshjen si një shtyllë kryesore të arkitekturës ndërkombëtare për mospërhapjen e armëve bërthamore "vunë në dukje ministrat e jashtëm të BE. "Mospërhapja e armëve bërthamore është një element i rëndësishëm i sigurisë botërore dhe rrezikimi i këtij principi do të ishte shumë e dëmshme. Shpresojmë që Kongresi të mos e vërë këtë marrëveshje në rrezik, "u tha gazetarëve Ministri i Jashtëm francez Jean-Yves Le Drian. Ministri i jashtëm hollandez Bert Koenders gjithashtu tha se marrëveshja ishte e rëndësishme për "sigurinë e botës", duke shtuar: "Shpresoj gjithashtu që Kongresi Amerikan ta kuptojë këtë dhe të marrë vendimet e duhura".