Armë ruse në Iran?
Ambasadori i Rusisë në Teheran, Levan Djagarian, tha se embargoja e armëve e Këshillit të Sigurimit të OKB mbi Iranin do të hiqet së shpejti, dhe lavdëroi armët ruse.
Teherani është i interesuar për pajisjet ushtarake ruse, tha ai në një intervistë me Sputnik, pa specifikuar llojin e armëve: "Po, natyrisht, sepse pajisjet tona ushtarake me të drejtë konsiderohen më të mirat dhe më të lirat në botë. " Në të njëjtën kohë, ai kujtoi se në fushën e bashkëpunimit ushtarako-teknik me Teheranin, Moska respektonte kufizimet e vendosura ndaj Iranit në përputhje me ligjin ndërkombëtar, në veçanti rezolutën 2231 të Këshillit të Sigurimit të Kombeve të Bashkuara. "Por këto kufizime janë të përkohshme - deri në tetor 2020," tha ai. Duke komentuar mundësinë që Irani të marrë sisteme raketash S-400 ruse, kreu i misionit diplomatik rus tha se Teherani duhet të vendosë vetë për këtë çështje. Sekretari i DASH, Mike Pompeo deklaroi se ishte i shqetësuar për heqjen e embargos së armëve ndaj Iranit, sepse në të ardhmen e afërt, Irani mund të blejë armë nga Rusia dhe Kina.
