Një jetë më e mirë me kodin moral të Kur'anit

Kur'ani është një libër frymëzues i etikës, drejtësisë dhe humanizmit; një libër që, duke urdhëruar drejtësinë, mirësinë dhe ruajtjen e lidhjeve familjare, dhe duke ndaluar imoralitetin, të keqen dhe padrejtësinë, përshkruan një rrugë të qartë për ndërtimin e një shoqërie të përzotshme dhe transcendente.

Ndër ajetet ndriçuese të Kur'anit famëlartë, ajeti 90 i sures Al-Nahl shkëlqen si një xhevahir i shndritshëm dhe me fjalë të përmbledhura dhe shprehëse shpjegon parimet themelore të etikës dhe vlerave shoqërore. Ky ajet u tregon njerëzve rrugën drejt lumturisë dhe shpëtimit duke thirrur për drejtësi, mirësi dhe ruajtjen e marrëdhënieve farefisnore, si dhe duke ndaluar imoralitetin, keqbërjen dhe dhunën.

إِنَّ ٱللَّهَ یَأْمُرُ بِالْعَدْلِ وَٱلْإِحْسانِ وَإِیتَائِ ذِى ٱلْقُرْبَى وَیَنْهَى عَنِ ٱلْفَحْشَاءِ وَٱلْمُنکَرِ وَٱلْبَغْىِ یَعِظُکُمْ لَعَلَّکُمْ تَذَکَّرُونَ

“Allahu urdhëron drejtësi, bamirësi dhe ndihmë të afërmve dhe ndalon nga imoraliteti, nga e neveritura dhe dhuna. Ju këshillon ashtu që të merrni mësim.”

Urdhëresa e parë hyjnore në këtë ajet është thirrja për drejtësi. Drejtësia është gurthemeli i çdo shoqërie të shëndetshme dhe dinamike. Drejtësi do të thotë të respektosh të drejtën në të gjitha çështjet, nga gjykimi dhe arbitrazhi deri te marrëdhëniet shoqërore dhe ekonomike. Një shoqëri në të cilën mbizotëron drejtësia do të jetë e lirë nga shtypja dhe padrejtësia, dhe të gjithë individët do të gëzojnë të drejta të barabarta.

Pas drejtësisë, Zoti urdhëron për bamirësi (ihsan). Bamirësia është një nivel më i lartë se drejtësia. Bamirësi (ihsan) do të thotë t’u bësh mirë të tjerëve, të ndihmosh ata që kanë nevojë, t’u falësh gabimet njerëzve dhe, në përgjithësi, të bësh çdo vepër të mirë të mundshme. Bamirësia forcon frymën e harmonisë dhe solidaritetit në shoqëri dhe i bën njerëzit të ndihen më të përgjegjshëm ndaj njëri-tjetrit.

Urdhëresa e tretë hyjnore është "t'u vish në ndihmë të afërmve". Kjo urdhëresë thekson rëndësinë e ruajtjes së lidhjeve farefisnore dhe atyre familjare. Islami e konsideron familjen si thelbin dhe bërthamën kryesore të shoqërisë dhe beson se nëse marrëdhëniet familjare janë të forta, edhe shoqëria do të jetë më e fortë dhe më e qëndrueshme.

Në kontrast me këto tre urdhëresa, Zoti ndalon tri gjëra: "imoralitetin, keqbërjen dhe dhunën". Fahsha (imoralitet) do të thotë veprime të shëmtuara dhe të papëlqyera; munker (keqbërje) do të thotë veprime që arsyeja dhe ligji fetar (shari'a) i konsiderojnë të shëmtuara, dhe bagh'j (dhunë, rebelim, tejkalim kufijsh) do të thotë padrejtësi dhe dhunë ndaj të tjerëve.