Ndryshimi në pozicionet saudite ndaj Iranit; shkaqet dhe reagimet

Në një bisedë të hapur me kanalin Al-Arabiya të martën në mbrëmje, Princi i Kurorës i Arabisë Saudite në një kthesë të qartë tha se Irani është një vend fqinj dhe Riadi shpreson të ketë një marrëdhënie të mirë me Teheranin.

Muhamed bin Salman është bërë gradualisht figura "e dytë më me ndikim" në Arabinë Saudite që nga janari 2015, kur babai i tij, mbreti Salman, erdhi në pushtet. Ardhja e Donald Trump në pushtet në Shtetet e Bashkuara në janar 2017 gjithashtu rriti ndikimin dhe pozicionin e bin Salman në strukturën e pushtetit saudit, pasi ish-presidenti amerikan kishte vendosur në agjendë mbështetjen e tij të plotë për Princin e Kurorës Saudite kundrejt marrëveshjeve të mëdha miliarda dollarëshe. Unilateralizmi i Bin Salman nuk ishte vetëm në politikën e brendshme saudite, por edhe në politikën e tij të jashtme, veçanërisht ndaj rajonit të Azisë Perëndimore. Ndërprerja e lidhjeve me Katarin, ndërprerja e lidhjeve me Republikën Islamike të Iranit dhe lufta kundër Jemenit janë ndër manifestimet e dukshme të kësaj politike. Qëndrimi arrogant i Mohammad bin Salman ndaj vendeve të rajonit, veçanërisht në lidhje me Republikën Islamike të Iranit, u mirëprit nga regjimi izraelit dhe qeveria amerikane. Princi i Kurorës Saudite ishte aq armiqësor me Republikën Islamike të Iranit, saqë në qershor 2017  ai në mënyrë të qartë deklaroi se luftën në rajonin e Azisë Perëndimore do ta shtrinte në brendësi të Iranit. Në fakt, kjo deklaratë jo-diplomatike dhe e qartë ishte kulmi i armiqësisë së Mohammad bin Salman ndaj Republikës Islamike të Iranit dhe kjo armiqësi gjithashtu ka pasur një ndikim të madh negativ në rendin politik dhe të sigurisë në rajonin e Azisë Perëndimore. Tani Princi i Kurorës Saudite, në një deklaratë të butë dhe diplomatike, ka deklaruar se Arabia Saudite dëshiron marrëdhënie të mira me Iranin. Mohammad bin Salman gjithashtu deklaroi: "Ne nuk duam që Irani të jetë në një situatë të vështirë, përkundrazi, ne duam që Irani të jetë i prosperuar dhe të zhvillohet. Ne kemi interesa në Iran dhe ata kanë interes në mbretërinë (Saudite) për ta udhëhequr rajonin dhe botën drejt zhvillimit dhe prosperitetit". Agjencia e lajmeve Reuters duke analizuar deklaratat e bin Salman, shkroi: "Mohammad bin Salman publikisht ka marrë një qëndrim pajtues ndaj Iranit dhe po përpiqet të zvogëlojë armiqësinë e kahershme për shkak të nevojës së ruajtjes së ekuilibrave ekonomike dhe për shkak  të mosmarrëveshjeve me Uashingtonin mbi mënyrën se si të përballen me politikat rajonale të Teheranit". Duket se izolimi dhe vetmia e Arabisë Saudite në vazhdimin e armiqësisë së saj me Iranin, ngecja e saj në batakun e Jemenit, si dhe shqetësimet e brendshme, janë shkaku i kësaj kthese në pozicionet e Princit të Kurorës Saudite. Muhamed bin Salman tani jo vetëm që nuk e ka Donald Trumpin pranë tij, por gjithashtu sheh pozicionin e lëkundur të Benjamin Netanjahut në Izrael. Në fakt, vazhdimi i armiqësisë ndaj Iranit nuk i shërben interesave të bin Salman dhe Arabisë Saudite, por është në përputhje me interesat e Izraelit. Në të njëjtën kohë, Princi i Kurorës Saudite është nën presion mbi katastrofën humanitare në Jemen dhe kotësinë e kësaj lufte gjashtë-vjeçare dhe e sheh përmirësimin e marrëdhënieve me Iranin si një rrugëdalje nga bataku i krijuar nga ai vetë në Jemen. Nga ana tjetër, politika e jashtme arrogante e bin Salman, e cila u shoqërua me humbje të njëpasnjëshme, dobësoi gjithashtu pozicionin e tij brenda Arabisë Saudite.