Akuza penale ndaj ish-kryeministrit izraelit

Një dëshmitar kyç është bërë pjesë e gjyqit penal ndaj ish-kryeministrit izraelit Benjamin Netanjahu.

Ish-zëdhënësi i tij, Nir Hefetz, dikur njeri i besuar i Netanjahut ka filluar të dëshmojë kundër tij në gjyqin për korrupsion në Jerusalem. Mediet hebreje shkruajnë se ai është dëshmitar kyç i prokurorisë dhe pritet të japë dëshmi kritike në gjyq. Ish-kryeministri izraelit akuzohet për mashtrim dhe se ka pranuar ryshfet. Netanjahu, tashmë lider i opozitës, mohon çdo keqbërje. Në vitin 2018, pasi u arrestua në lidhje me një nga rastet e korrupsionit të Netanjahut, Hefetz nënshkroi një marrëveshje ku bëhej bashkëpunëtor i drejtësisë dhe u dha hetuesve regjistrime të bisedave me Netanjahun dhe familjen e tij. Informacioni i paraqitur javën e kaluar pretendonte se gruaja e Netanjahut, Sara, kishte pranuar një byzylyk të shtrenjtë si dhuratë nga dy miq miliarderë. Netanjahu u paraqit në gjykatën e qarkut të Jerusalemit të hënën në mëngjes i rrethuar nga politikanë të tjerë të partisë Likud. Mbi të rëndojnë tre akuza për korrupsion, mitmarrje dhe abuzim me pushtetin.