Forcat jemenase shkatërrojnë objektet e naftës në Arabinë Saudite

Forcat e armatosura të Jemenit kanë kryer sulme ajrore duke synuar objektet e gjigantit shtetëror të naftës të Arabisë Saudite, Aramco.

Zëdhënësi i ushtrisë së Jemenit, Jahja Sarei, tha të premten se raketat kishin shënjestruar objektet e kompanisë së naftës Aramco në qytetin port të Xheddas dhe dronët kishin kryer sulme në rafineritë Ras Tanura dhe Rabigh. Objekte thelbësore u sulmuan gjithashtu nga Jemeni në kryeqytetin saudit Riad, tha zëdhënësi i ushtrisë së Jemenit. Dronët goditën gjithashtu objektet e kompanisë Aramco në Xhizan dhe Naxhran, në jugperëndim të Arabisë Saudite. Më herët, media shtetërore saudite raportoi gjithashtu një varg sulmesh me dronë dhe raketa nga forcat jemenase ndaj objektivave në Xhedda. Ushtria jemenase tha në një deklaratë të transmetuar nga rrjeti televiziv al-Masirah se kishte nisur operacionin "Thyerja e Rrethimit-3". Ministri i Jashtëm i Jemenit, Hisham Sharaf, tha se objektet e sulmuara ishin financiarisht jetike për Arabinë Saudite. Forcat e armatosura të Jemenit, tha ai, u përpoqën të dobësonin aftësinë e Riadit për të financuar luftën vdekjeprurëse. Arabia Saudite dhe një numër i aleatëve të saj rajonalë – përfshirë Emiratet e Bashkuara Arabe– nisën luftën brutale ndaj Jemenit për të eliminuar lëvizjen popullore Ansarullah të Jemenit dhe për të riinstaluar regjimin e mëparshëm. Agresioni, i shoqëruar nga një bllokadë e fortë, nuk ka arritur të realizojë qëllimet e tij, por ka vrarë qindra mijëra jemenas.