Turqia ofron bashkëpunim me Damaskun kundër YPG-së kurdë

Ministri i Jashtëm turk Mevlut Cavusoglu tha se Ankaraja është e përgatitur të ndihmojë qeverinë siriane në përpjekjet e saj për të larguar anëtarët e grupit militant kurd të Njësive të Mbrojtjes së Popullit (YPG) të mbështetur nga SHBA nga zonat e pasura me energji në Sirinë verilindore.

Cavusoglu i tha stacionit të lajmeve televizive TV1000 se vendi i tij është i përgatitur të bashkëpunojë me Damaskun në një fushatë të tillë. “Ne do t'i japim të gjitha llojet e mbështetjes politike regjimit sirian në këtë drejtim. Është e drejta më e natyrshme e regjimit sirian që të pastrojë një organizatë terroriste në territorin e vet”, tha kryediplomati turk. Deklaratat e Cavusoglu vijnë pas kërcënimeve të përsëritura të Presidentit Recep Tayyip Erdogan për një operacion të ri ushtarak në Sirinë veriore. Më 19 korrik, presidenti turk mori një paralajmërim për këtë ofensivë nga Lideri Suprem i Revolucionit Islamik Ajetollah Khamenei, vendi i të cilit ka ndihmuar Sirinë në fushatën e saj anti-terroriste, në një takim dypalësh. Ajetollah Khamenei i tha Erdoganit se çdo ofensivë turke në Siri do të ishte "e dëmshme" për Sirinë, vetë Turqinë dhe të gjithë rajonin, duke bërë thirrje që çështja të zgjidhet përmes dialogut midis Ankarasë, Damaskut, Moskës dhe Teheranit. Moska gjithashtu i ka bërë thirrje Ankarasë që të "përmbahet" nga një sulm kundër Sirisë.