Oficerët izraelitë: Izraeli larg fitores në Gaza

Dhjetëra oficerë rezervistë izraelitë i kanë dërguar një letër Shefit të Shtabit të Ushtrisë izraelite Herzi Halevi, duke thënë se Izraeli është ende larg fitores në Gaza më shumë se dhjetë muaj pas luftës atje.

Letra, e nënshkruar nga rreth 100 oficerë, shprehte habinë për deklaratat e përsëritura të zyrtarëve të lartë të ushtrisë izraelite që kishin pretenduar se fitorja ishte e arritshme, raportoi të dielën televizioni Channel 14 i Izraelit.

“Ne, që erdhëm nga terreni, e dimë shumë mirë se situata është ende larg fitores”, thanë nënshkruesit, duke shtuar se grupet e rezistencës në Gaza janë ende në zotërim të aftësive ndërkufitare, dronëve dhe një rrjeti të gjerë tunelesh.

Komente të ngjashme janë bërë më parë nga gjenerali rezervist izraelit Itzhak Brik, në përgjigje të pretendimeve të kryeministrit Benjamin Netanyahu dhe zyrtarëve të tjerë izraelitë se fitorja në Gaza është afër.

Brik tha se një fitore vendimtare në Gaza është e paarritshme, duke shtuar se një fitore e afërt është thjesht një iluzion që zyrtarët izraelitë po përdorin për të mashtruar publikun.

Gjenerali izraelit tha gjithashtu se Hamasi është ende në kontroll të Gazës ushtarakisht dhe politikisht, me tunelet e tij që ende funksionojnë.