OKB: Deklaratat izraelite për xhaminë Al-Aksa rrisin tensionet

Kombet e Bashkuara kanë dënuar deklaratat e fundit të izraelitit të ekstremit të djathtë Itamar Ben-Gvir në lidhje me ndërtimin e një sinagoge brenda kompleksit të xhamisë Al-Aksa në Kudsin e pushtuar.

Sipas raportit të IRNA, mëngjesin e së martës zëdhënësi i OKB-së, Stephen Dujarric, u tha gazetarëve në një konferencë shtypi se deklarata të tilla kanë një ndikim negativ dhe rrezikojnë të përshkallëzojnë një situatë që tashmë është shumë e tensionuar.

Duke theksuar ndjeshmërinë e vendeve të shenjta në Kuds, Dujarric tha se marrëveshja e arritur nga palët duhet të respektohet nga të gjithë.

Ai bëri thirrje për respektimin e marrëveshjes së kaluar dhe për parandalimin e bërjes së deklaratave që përshkallëzojnë më tej tensionet.

Itamar Ben-Gvir, i cili njihet për ekstremizmin e tij, në një deklaratë të fundit tha se politika e regjimit të Izraelit i lejon sionistët të falen në xhaminë Al-Aksa dhe se ai planifikon të ndërtojë atje një sinagogë.

Zyra e kryeministrit Benjamin Netanyahu, në përgjigje të këtyre deklaratave, njoftoi se nuk ka pasur ndryshime në status quo-në e xhamisë Al-Aksa, por Ben-Gvir së bashku me kolonët sionistë të mbështetur nga trupat izraelite shpesh hyjnë në xhaminë Al-Aksa.

Jordania, e cila është kujdestari i vendit të tretë më të shenjtë të Islamit, ka thënë se do të marrë masat e nevojshme për të ndaluar sulmet në vendet e shenjta dhe për të përgatitur çështje ligjore për veprim në gjykatat ndërkombëtare kundër shkeljeve të Izraelit.

Sipas marrëveshjes së vitit 1967, jomyslimanët, përfshirë hebrenjtë nuk lejohen të hyjnë në xhaminë Al-Aksa për të kryer ritualet e tyre. Vizitorët lejohen të hyjnë në kompleks vetëm në ditë dhe orë të caktuara.