Hamasi mban përgjegjës Netanyahun për vdekjen e një robëreshe izraelite

Hamasi tha se një robëreshë izraelite është vrarë në Gazën veriore, duke e mbajtur kryeministrin izraelit Benjamin Netanyahu dhe kabinetin e tij përgjegjës për jetën e robërve.

Abu Ubaida, zëdhënës i Brigadave al-Kasam, krahu ushtarak i Hamasit, i bëri komentet të shtunën, ndërsa regjimi izraelit vazhdon intensifikimin e bombardimeve në Rripin e Gazës.

"Krimineli i luftës Netanyahu, regjimi i tij dhe udhëheqësit e tij ushtarakë mbajnë përgjegjësi të plotë për jetën e robërve të tyre, pasi po këmbëngulin të intensifikojnë vuajtjet e tyre dhe të shkaktojnë vdekjen e tyre," tha Abu Ubaida.

Ai shtoi se "pas rilidhjes me luftëtarët e ngarkuar me ruajtjen e robërve izraelitë pas disa javësh mungesë kontakti, u zbulua se një nga robëreshat izraelite u vra në një sulm të regjimit sionist në veri të Rripit të Gazës".

"Jeta e një tjetër gruaje robëreshë që ishte me të mbetet në rrezik serioz," shtoi ai.

Rreth 250 persona u zunë rob më 7 tetor të vitit të kaluar gjatë Stuhisë Al-Aksa, një operacion hakmarrës nga grupet e rezistencës palestineze.

Hamasi liroi 105 prej robërve gjatë një armëpushimi njëjavor nëntorin e kaluar.