Hamasi: Hedhim poshtë deklaratat e Trumpit për spastrimin etnik të palestinezëve

Izzat Al-Rishq dënoi ashpër deklaratat kontroverse të presidentit amerikan për dëbimin e palestinezëve nga Gaza.

Sipas agjencisë së lajmeve Mehr, duke cituar rrjetin televiziv Al-Jazeera, presidenti amerikan Donald Trump, në deklaratat e tij të fundit, bëri thirrje për zhvendosjen e palestinezëve nga Gaza dhe pranimin e tyre nga Jordania dhe Egjipti; një çështje që shkaktoi reagim të fortë nga palestinezët.

Kësisoj, Izzat al-Rishq, një nga udhëheqësit politikë të Lëvizjes së Rezistencës Islamike Palestineze (Hamas), dënoi deklaratat e Trumpit për spastrimin etnik të palestinezëve nga Gaza.

Në lidhje me këtë, ai tha: “Ne hedhim poshtë deklaratat e Trumpit në të cilat ai u bëri thirrje banorëve të Gazës të largohen nga toka e tyre me pretekstin e rindërtimit”.

Al-Rishq theksoi: “Deklaratat e Trumpit janë raciste dhe një përpjekje e qartë për të shkatërruar kauzën palestineze dhe për të mohuar të drejtat tona kombëtare. Për më shumë se 15 muaj, populli ynë në Gaza ka penguar planet për shpërngulje dhe internim duke qenë nën bombardime dhe nuk do të pranojnë asnjë plan për t'i zhdukur ata”.

Gjithashtu, Hazem Kasem, zëdhënësi i Lëvizjes Hamas, lidhur me deklaratat e bëra nga presidenti amerikan, tha: “Ne i hedhim poshtë me forcë deklaratat e Trumpit për zhvendosjen e palestinezëve nga Gaza. Deklaratat e Amerikës janë raciste dhe demonstrojnë mungesë të standardeve morale dhe njerëzore”.

Ai shtoi: “Qëllimi i vërtetë i pushtuesve në agresionin e tyre kundër Gazës është të zhvendosin palestinezët nga Rripi i Gazës”.

Ai kujtoi: “Procesi i rindërtimit mund të kryhet duke mbetur aty banorët e Gazës, jo duke i zhvendosur ata siç propozon e djathta sioniste”.