Ambasadori saudit të largohet sa më shpejt nga Iraku

Ministri i jashtëm irakian deklaroi se ambasadori i Arabisë Saudite në Bagdad duhet të largohet sa më shpejt nga Iraku.

Ibrahim Xhaferi tha se qeveria e Arabisë Saudite ka deklaruar se ka pranuar kërkesën e Irakut për ndërrimin e ambasadorit saudit Samer Al Subhan. Ministri i jashtëm irakian tha se Samer Al Subhan jo vetëm që nuk respekton normat diplomatike por shpeshherë ka ndërhyrë në punët e brendshme të Irakut duke u përpjekur të nxisë urrejtjen ndëretnike dhe ndërfetare në Irak. Qeveria irakiane e ka shpallur ambasadorin saudit si “person non-grata” dhe ka kërkuar nga Riadi emërimin e një ambasadori të ri në Bagdad.