Mbi dy milionë të pranishëm në ceremoninë e Ashures në Qerbela
Ceremonia e Ashures huseiniane përfundoi sot në Qerbela dhe sipas zyrtarëve lokalë, numri i pelegrinëve të pranishëm në ceremoninë në këtë qytet e kaloi shifrën e dy milionë njerëzve.
Qindra mijëra pelegrinë, nga India, Pakistani, Afganistani, Irani, Azerbajxhani, Libani dhe shumë vende të tjera, shkuan në Qerbala, ku zyrtarët thanë se numri i tyre arrin në mbi 2 milionë. Gjithashtu, miliona myslimanë në Iran dhe vende të tjera myslimane përkujtuan ditën e dhjetë të Muharremit që shënon përvjetorin e martirizimit të Imam Huseinit (as), Imamit të tretë të myslimanëve shi’itë. Për myslimanët, Ashura, dita e dhjetë e Muharremit, shënon kulmin e ceremonive të muajit Muharrem dhe përkujton martirizimin e Husein ibn Aliut, nipit të Profetit Muhamed (savs) në betejën e Qerbelasë në 10 Muharrem të vitit 61 hixhri kameri. Beteja e Qerbelasë midis një grupi të vogël përkrahësish dhe të afërmish të Imam Huseinit dhe një ushtrie të madhe të Kalifit Emevit, Jezidit, simbolizon luftën midis të mirës dhe së keqes.