Damasku: Turqia mashtron, operacioni turk është agresion dhe pushtim
Damasku është ankuar në OKB rreth operacionit ushtarak të Turqisë në Sirinë veriore, duke denoncuar operacionin si "një sulm dhe pushtim" të territorit sirian.
Ankaraja vazhdon të "përhapë gënjeshtra" në lidhje me agresionin e saj ushtarak kundër Sirisë dhe përpiqet ta justifikojë atë si një veprim të vetëmbrojtjes, theksoi Ministria e Jashtme siriane në dy letra drejtuar shefit të OKB-së dhe kryetarit të Këshillit të Sigurimit të OKB. "Republika Arabe Siriane thekson se prania e çdo force ushtarake të huaj në territorin e saj pa miratimin e qeverisë siriane është një agresion i hapur dhe një okupim, i cili do të trajtohet mbi këtë bazë," theksoi Ministria e Jashtme e Sirisë. Ministria e Jashtme siriane i kërkoi më tej Këshillit të Sigurimit të OKB-së "të mos lejojë asnjë shtet të përdorë forcën në një mënyrë që bie në kundërshtim me të drejtën ndërkombëtare ose të bazohet në Kartën e OKB për të justifikuar mizoritë dhe agresionet e tij ".
