Edukim online për vajzat afgane nga Fondacioni Ahmad Shah Masud
Fondacioni Ahmad Shah Masud njoftoi lehtësimin e arsimimit në internet të vajzave afgane të privuara nga arsimi.
"Ne po lehtësojmë arsimin online për vajzat në Afganistan të cilave u është mohuar e drejta për arsim të mesëm dhe të lartë," tha në një deklaratë Fondacioni Ahmad Shah Masud, njoftoi agjencia afgane e lajmeve ANA. Tre ditë më parë udhëheqësi i Frontit të Rezistencës në Panjshir, Ahmad Masud, në një konferencë për nder të Ahmad Shah Masud në Universitetin e Kembrixhit në Britani, deklaroi: "Ne duam një qeveri gjithëpërfshirëse, një qeveri që respekton të drejtat e grave, një qeveri që jo vetëm nuk është e izoluar, por gjithashtu ka marrëdhënie të mira me të gjitha vendet e botës". Talebanët i kanë ndaluar vajzat dhe gratë të hyjnë në shkollat e mesme në Afganistan dhe kanë lejuar vetëm djemtë të ndjekin shkollën. UNESCO, ndërkohë, bëri thirrje për rihapjen e të gjitha shkollave të mesme të vajzave, duke paralajmëruar se dështimi për ta bërë këtë do të kishte "pasoja të pariparueshme" për gjysmën e popullsisë së Afganistanit.