Vaksinimi i detyrueshëm në Evropë dhe protestat e qytetarëve

Vende të ndryshme në BE po marrin masat për të nxitur sa më shumë njerëz që të vaksionohen. Por nuk po mungojnë as protesta kundër këtyre masave.

Pasi në fillim të vitit në vendet e BE-së për shkak të mungesës së furnizimit me vaksina ishte i frenuar procesi i vaksinimit, tani vërehet që njerëzit gjithnjë e më shumë po e humbasin gatishmërinë për të marrë vaksinën. Shumë politikanëve drejtues kjo nuk u pëlqen – për më tepër tani me rritjen e vlerave të incidencës së infeksioneve me variantin Delta të virusit. Në shumë vende si rrjedhojë ka shpërthyer debati, nëse duhet të ketë kufizime të ndryshme për të vaksinuarit dhe të pavaksinuarit, ose nëse duhet vendosur detyrimi për vaksinim, në mënyrë që të krijohet imuniteti i tufës në popullsi. Në Gjermani ky diskutim po vazhdon, ndërkohë që në vende të tjera janë marrë masat. Kryesisht sa i përket detyrimit për vaksinim për grupe të ndryshme profesionesh. Në shumë vende kanë nisur edhe protestat. Franca ka shpallur nga shtatori vaksinimin e detyrueshëm duke e vendosur atë si kusht për ushtrimin e profesionit. Në fundjavën e kaluar në Francë protestuan në mbarë vendin mbi 160.000 vetë kundër masave të rrepta ndaj Coronës. Protestuesit janë kundër detyrimit për vaksinim duke e konsideruar këtë si një ndërhyrje në të drejtën e vetëvendosjes. Kryesisht të punësuarit në sektorin e shëndetësisë, të sigurisë dhe shërbimit të emergjencës duhet të vaksinohen në rast të kundërt atyre nuk do t'u lejohet të vazhdojnë punën. Protestat drejtohen edhe kundër certifikatës digjitale të vaksinimit në BE. Kjo e ashtuquajtur „Pasaportë e gjelbër" provon që personi është i vaksinuar, i shëruar apo është testuar aktualisht me rezultat negativ. Protestat paqësore kanë qenë pjesërisht edhe me eksese duke shkaktuar përplasje me policinë. Greqia gjithashtu ka vendosur vaksinimin e detyrueshëm. Por edhe në Greqi njerëzit kanë protestuar. Nga shtatori në Greqi ka hyrë në fuqi vaksinimi i detyrueshëm për sektorin e shëndetësisë. Sipërmarrësve që punësojnë me personel të pavaksinuar do t'u vendosen gjoba deri në 200.000 Euro. Edhe vizitat në lokalet e gastronomisë si dhe aktivitetet kulturore do të jenë të hapura vetëm për të vaksinuarit. Kur u miratua ligji përkatës në parlament në mbarë vendin protestuan rreth 5000 vetë. Policia përdori gaz lotësjellës dhe pompa të ujit për ta larguar turmën nga territori përpara parlamentit. Më shumë se 8000 policë po kryejnë kontrolle intensive në lokale, bare dhe njësi shërbimi, me gjobat që variojnë nga 150 në 300 euro për qytetarët dhe 5000 deri në bllokim i biznesit për disa ditë, për  ata që nuk respektojnë masat e vendosura. Certifikata e vaksinimit duhet edhe në lokale me ambiente të hapura të bareve dhe restoranteve, ndërsa në mbarë vendin shifrat e infeksioneve janë mbi 6000 në ditë, çka ka po çon drejt ezaurimit të gjitha dhomat e terapisë intensive në spitalet e vendit. Epidemiologët bëjnë thirrje për vaksinim të detyrueshëm, ose në të kundërtën shifrat  e infektimeve do të tejkalojnë 10.000 në ditë. Greqia po kalon valën e katërt të infektimeve me shifra tepër të larta infektimesh, kryesisht në Greqinë e veriut, ku personat që refuzojnë të vaksinohen janë më tepër se ata që kanë marrë qoftë një dozë të vaksinës. Në Itali gjithashtu ka pasur protesta kundër „certifikatës digjitale të vaksinimit". Detyrimi për vaksinimin e personelit shëndetësor në Itali është në fuqi qysh nga marsi. Qeveria vendosi që duke filluar nga 6 gushti në shumë mjedise publike të lejohen vetëm të vaksinuarit me pasaportën e gjelbër.