Kremlini: SHBA po përshkallëzon tensionet rreth Ukrainës

Kremlini thotë se Shtetet e Bashkuara po nxisin tensionet rreth Ukrainës, duke theksuar se Moska po e shikon me shqetësim të madh këtë lëvizje, pasi Uashingtoni vendosi mijëra trupa në gatishmëri për dislokim në Evropën Lindore.

Duke folur të martën në një konferencë shtypi në kryeqytetin Moskë, zëdhënësi i Kremlinit Dmitry Peskov akuzoi Uashingtonin për përshkallëzimin e tensioneve me vendosjen e 8,500 forcave në Evropën Lindore për të përforcuar rajonin kundër një kërcënimi të supozuar rus. "Shtetet e Bashkuara po përshkallëzojnë tensionet," u tha Peskov gazetarëve. "Ne po i shikojmë këto veprime të SHBA me shqetësim të madh." Peskov gjithashtu u tha gazetarëve të martën se presidenti rus Vladimir Putin do të bisedojë këtë javë me homologun e tij francez, Emmanuel Macron, i cili gjithashtu po planifikon të flasë me presidentin ukrainas Volodymyr Zelenskiy për krizën. Peskov tha se "Ne po jetojmë në një mjedis agresiv", duke shtuar se presidenti rus Vladimir Putin po merrte "masat e nevojshme" për të mbrojtur vendin. Zëdhënësi i Kremlinit tha se Shtetet e Bashkuara dhe aleatët e tyre po përshkallëzojnë tensionet përmes "histerisë së informacionit" dhe duke njoftuar planet për të shtuar trupat e NATO-s në Evropën Lindore, duke paralajmëruar se rreziku i një ofensive nga trupat ukrainase kundër forcave pro-ruse në lindjen e paqëndrueshme të Ukrainës është " shumë e lartë.”