Kina: Politikat ekspansioniste të NATO-s janë të vjetruara

Në Konferencën e Sigurisë së Mynihut, ministri i jashtëm kinez kritikoi politikat ekspansioniste të NATO-s, ndërsa kryeministri britanik paralajmëroi se Evropa ishte në prag të një lufte, tronditja e së cilës do të godiste Azinë Lindore dhe Tajvanin.

Duke folur në Konferencën e Sigurisë në Mynih të shtunën (19 shkurt), ministri i jashtëm i Kinës tha se politikat ekspansioniste të NATO-s janë të vjetruara dhe Ukraina duhet të jetë një urë lidhëse midis Lindjes dhe Perëndimit dhe jo një vend konfrontimi. Duke theksuar nevojën për të ruajtur pavarësinë dhe sovranitetin e Ukrainës, ministri i jashtëm kinez i kërkoi Perëndimit të ndiqte rrugën e paqes në vend që t'i binte daulleve të luftës. Zyrtari kinez bëri thirrje për krijimin e një udhërrëfyesi të qartë por edhe për zbatimin e plotë të marrëveshjes së Minskut për zgjidhjen paqësore të krizës ukrainase duke marrë parasysh shqetësimet e Rusisë për sigurinë në Evropë. Megjithatë, për kryeministrin britanik, kriza ukrainase po e çon Evropën në prag të një lufte të plotë: sulmi i mundshëm i Rusisë ndaj Ukrainës, pohon ai, "është një kërcënim i madh për botën" dhe "goditja do të tronditë të gjithë botën". Duke u paraqitur si mbrojtës i lirisë dhe demokracisë, kryeministri britanik Boris Johnson ka paralajmëruar se zhurma e sulmit të Rusisë ndaj Ukrainës do të dëgjohet deri në Azinë Lindore dhe Tajvan. Duke vënë në pikëpyetje besueshmërinë e premtimeve të qeverive perëndimore për të mbështetur Ukrainën, Johnson në mënyrë implicite i hodhi poshtë ato si të pavlefshme, duke shtuar se do të ishte fyese të neglizhohej pushtimi i Ukrainës.