Moska kërcënon evropianët me armën e energjisë

Evropianët së shpejti do të duhet të paguajnë 2000 euro për një mijë metër kub gaz natyror, shkroi sot në Twitter ish-presidenti rus dhe nënkryetari aktual i Këshillit të Sigurimit, Dmitry Medvedev.

Paralajmërimi vjen pasi Gjermania urdhëroi pezullimin e procesit të miratimit të gazsjellësit Nord Stream 2. "Kancelari gjerman Olaf Scholz ka urdhëruar ndalimin e certifikimit për gazsjellësin Nord Stream 2. Mirë se erdhe në botën e re, ku evropianët së shpejti do të paguajnë 2000 euro për 1000 metër kub gaz!", shkroi Medvedev në një postim në Twitter. Kancelari gjerman Scholz kishte thënë më parë se i kishte kërkuar Ministrisë Gjermane të Ekonomisë që të sigurohej që miratimi i tubacionit të mos mund të bëhej në këtë moment. Tubacioni prej 12 miliardë dollarësh, i cili është tërësisht në pronësi të gjigantit energjetik shtetëror rus Gazprom, mund të transportojë 55 miliardë metër kub gaz natyror në vit nga Rusia në Gjermani. Edhe pse përfundoi në gusht të vitit të kaluar, gazsjellësi është ende në pritje të miratimit nga Gjermania.