Rusia: Prania e armëve bërthamore amerikane në Evropë "e papranueshme"

Ministri i Jashtëm rus Sergei Lavrov e ka përshkruar praninë e armëve bërthamore amerikane në Evropë si "të papranueshme" për Moskën, duke paralajmëruar se Rusia nuk do të kursejë asnjë përpjekje për të parandaluar Ukrainën që të marrë armë të tilla vdekjeprurëse.

Në një fjalim video në konferencën e Gjenevës mbi çarmatimin të martën, Lavrov tha se prania e armëve bërthamore të SHBA në një numër vendesh evropiane ishte në kundërshtim me Traktatin e Mospërhapjes (NPT) dhe se armë të tilla duhej të ishin kthyer prej kohësh në tokën amerikane për të parandaluar një raund të ri të një gare armatimesh. “Është e papranueshme për ne që, në kundërshtim me parimet themelore të Traktatit të Mospërhapjes, armët bërthamore të SHBA janë ende të pranishme në territorin e disa vendeve evropiane”, tha ai në konferencë. Lavrov kritikoi gjithashtu praktikën e të ashtuquajturave "misione të përbashkëta bërthamore" që përfshijnë anëtarë jo-bërthamorë të NATO-s. “Praktika e keqe e misioneve të përbashkëta bërthamore me pjesëmarrjen e shteteve jo-bërthamore të NATO-s vazhdon. Gjatë misioneve të tilla, po praktikohet përdorimi i armëve bërthamore kundër Rusisë," tha kryediplomati rus. "Armët bërthamore amerikane duhej të ishin kthyer prej kohësh në Amerikë dhe infrastruktura përkatëse në Evropë duhej të ishte eliminuar prej kohësh". Lavrov theksoi se Rusia gjithmonë ka besuar se nuk mund të ketë fitues në një luftë bërthamore dhe se një luftë e tillë nuk duhet të ndodhë kurrë. Duke paralajmëruar se Rusia po bënte gjithçka që mundej për të parandaluar Ukrainën që të merrte armë bërthamore, Lavrov tha se fuqitë perëndimore duhet të përmbahen nga krijimi i instalimeve ushtarake në ish-shtetet sovjetike që nuk janë anëtare të NATO-s. Ministri i Jashtëm rus i bëri thirrje Ukrainës që të kuptojë seriozitetin e situatës aktuale dhe tha se "qeveria neo-naziste" në Kiev nuk përfaqëson tërësinë e popullit ukrainas.