Për Putinin gjërat nuk po shkojnë mirë në Ukrainë

Në fjalimin e fundit drejtuar familjeve të ushtarëve që luftojnë në Ukrainë, presidenti rus, Vladimir Putin duket se ka pranuar se gjërat nuk po shkojnë aq mirë sa mund të pritej.

“Unë e kuptoj që ju kujdeseni për të dashurit tuaj, mund të jeni krenarë për ta, ashtu si i gjithë vendi është krenar për ta dhe kujdeset për ta bashkë me ju”, tha ndër të tjera Putin. Presidenti rus ditë më parë i është drejtuar bizneseve se sanksionet do iu shkaktojnë pak probleme, por që kjo është kostoja e një “operacioni special” në Ukrainë. Këshilltari amerikan për Sigurinë Kombëtare, Jake Sullivan tha sot se fakti që Rusia nuk ka patur rezultatin e synuar kundër qyteteve të mëdha Ukrainase, tregon zgjerimin e objektivave të saj duke sulmuar e shkatërruar çdo vend. Ai tha gjithashtu se sulmet ruse në Lviv, afërsisht 12 milje nga kufiri i Ukrainës me Poloninë, janë një shenjë që Putini dhe forcat e tij ushtarake nuk po përparojnë në arritjen e objektivave të synuara. “Ne po e shikojmë këtë jashtëzakonisht nga afër, dhe padyshim, rreziku i përshkallëzimit me një fuqi bërthamore është i rëndë dhe është një lloj konflikti i ndryshëm nga konfliktet e tjera që populli amerikan ka parë gjatë viteve,” tha Sullivan. Ai tha se SHBA është duke e monitoruar situatën në Ukrainë vazhdimisht dhe se kjo është prioriteti kryesor për Presidentin e SHBA-së.