Bisedimet Rusi-Ukrainë kanë ngecur

Bisedimet e paqes midis Rusisë dhe Ukrainës kanë ngecur, me të dy palët që shkëmbejnë akuza për prishjen e negociatave.

Zëvendësministri i Jashtëm rus Andrei Rudenko tha se Ukraina ishte "tërhequr praktikisht nga procesi i negociatave", duke fajësuar Kievin për mospajtimin me kushtet e Moskës. Këshilltari presidencial ukrainas Mykhailo Podolyak konfirmoi se bisedimet ishin "në pritje", duke thënë se Rusia nuk ishte e gatshme të pranonte që negociatat "nuk do të arrinin asnjë qëllim". Pas njoftimeve, Rusia akuzoi Ukrainën për forcimin e qëndrimit të saj dhe Perëndimin për përkrahjen e qeverisë në Kiev, duke theksuar se kthimi në bisedime mund të jetë i vështirë. Ministri i Jashtëm rus Sergei Lavrov tha se vendet perëndimore dëshironin të përdornin Ukrainën për avantazhin e tyre strategjik, duke argumentuar se asnjë marrëveshje paqeje nuk mund të arrihet nëse negociatorët fokusohen në shqetësimet e Perëndimit dhe jo në situatën aktuale në Ukrainë. “Ne gjithmonë themi se jemi gati për negociata... por nuk na është dhënë zgjidhje tjetër”, tha ai. Lavrov tha se Perëndimi kishte përgatitur mjete, si NATO, për të frenuar Rusinë që nga fundi i viteve 1990, duke theksuar se gjatë gjithë atyre viteve, Rusia kishte insistuar në negociata, por ishte injoruar. "Tani do t'i zgjidhim problemet varësisht se si i shohim. Unë gjithmonë do të theksoj: ne jemi të gatshëm të zgjidhim çështjet humanitare," tha ai.