Moska paralajmëron gazetarët amerikanë

Moska ka kërcënuar se do të heqë akreditimet e gazetarëve amerikanë në Rusi “si përgjigje ndaj trajtimit të gazetarëve rusë në Shtetet e Bashkuara”.

“Nëse nuk normalizojnë punën e mediave ruse në territorin amerikan, do të ketë masa të forta si pasojë”, citohet të ketë thënë zëdhënësja e Ministrisë së Jashtme, Maria Zakharova, pasi kishte ftuar përfaqësuesit e mediave amerikane në ministri. Zakharova paralajmëroi se gazetarët amerikanë “do të duhet të largohen” nga Rusia nëse trajtimi i kolegëve të tyre rusë nuk përmirësohet, sipas Reuters. Ajo kërcënoi gjithashtu me pengesa për vizat, akreditimin e mediave dhe llogaritë bankare për reporterët amerikanë, ndërsa ankohej për “keqtrajtime” të gazetarëve rusë nga agjencitë e inteligjencës amerikane në SHBA. Media shtetërore ruse raportoi se përfaqësues nga The Wall Street Journal, CNN, Associated Press, NPR dhe transmetuesi në gjuhën arabe me bazë në SHBA, Alhurra, kishin marrë pjesë në takimin me Zakharova.