Luhansku  bie nën kontrollin e Rusisë

Së bashku me njoftimin për marrjen e plotë të rajonit të Luhanskut, Ministria ruse e Mbrojtjes pretendoi se të gjitha raketat e lëshuara nga forcat e Kievit në "Belgorod" u shkatërruan në ajër nga mbrojtja anti-ajrore ruse.

Duke marrë parasysh humbjet e fundit të shkaktuara palës ukrainase në fushën e betejës, Ministria ruse e Mbrojtjes njoftoi se të gjitha raketat e lëshuara nga nacionalistët ukrainas në rajonin "Belgorod" ishin kapur dhe shkatërruar, raportoi Ria Novosti, të dielën 3 korrik. Mbrojtja ajrore ruse rrëzoi dy avionë luftarakë Sukhoi-25 të ushtrisë ukrainase mbi rajonet Kharkiv dhe Mykolaiv. Mbrojtja ajrore ruse përgjoi dhe shkatërroi gjithashtu 10 dronë ukrainas që fluturonin mbi rajonet  Zaporizhzhia, Kharkiv dhe Republika Popullore e Donetskut gjatë ditës dhe natës së kaluar. Përveç kësaj, tetë raketa të lëshuara nga sistemet anti-raketore me shumë lëshime, duke përfshirë katër sisteme Himars të vendosura në Republikën Popullore të Luhanskut dhe katër sisteme Oragan në rajonet Donetsk, Luhansk dhe Kharkiv, u interceptuan dhe u rrëzuan nga mbrojtja anti-ajrore ruse. Zhvillimet vijnë pasi ministri rus i Mbrojtjes Sergei Shoigu informoi, sipas Sputnik, presidentin Vladimir Putin për "çlirimin e plotë të Republikës Popullore të Luhanskut" nga kontrolli i forcave ukrainase. Lajmi vjen pas  raporteve që njoftojnë hyrjen e trupave ruse në Lysychansk, qyteti i fundit i madh i Luhanskut që kontrollohej nga forcat ukrainase. Çlirimi i Luhanskut përfundoi me rënien e qytetit Lysychansk, si dhe të disa qyteteve fqinje tani nën kontrollin e Rusisë dhe forcave të armatosura të Republikës së Luhanskut, njoftoi ministria ruse e Mbrojtjes  duke shtuar se forcat e Donetskut dhe të Luhanskut çliruan 182 km territore nën kontrollin e forcave të Kievit. Ndërsa raportet e shumta konfirmojnë rënien më 2 korrik të qytetit Lysytchansk, bastioni i fundit i madh i forcave ukrainase në Luhansk, Kievi vazhdon të mohojë informacionin duke pranuar megjithatë se situata është e rëndë. Një këshilltar i presidentit ukrainas Volodymyr Zelensky ka pranuar se pasi luftimet u intensifikuan në bastionin e fundit të madh të vendit në provincën strategjike lindore të Luhanskut, qyteti Lysychansk shpejt mund të jetë në kontrollin e pushtuesve. Përveç demilitarizimit dhe denazifikimit të Ukrainës, çlirimi i dy republikave të vetëshpallura të Luhanskut dhe Donetskut në rajonin e Donbasit në lindje të Ukrainës ishte shpallur si objektivi kryesor i operacionit ushtarak special rus në Ukrainë, i nisur më 24 shkurt 2022.